بەرشەلۆنە پلانێک بۆ داهاتووی بەهرەمەندە نوێکەی دادەنێت

وەرزش

30/07/2025     ژمارەی بینراو 249

ڕاچڵەکین سپۆرت -

 

یاریزانی لاوی بەرشەلۆنە، پێدرۆ فێرناندێز سارمینتۆ، ناسراو بە "درۆ"، لەو چەند خولەکە کەمەی بەرانبەر ڤیسێل کۆبی یاریکرد، سەرنجی هەموانی بە لایخۆیدا ڕاکێشا، کاتێک گۆڵێکی نایابی بە لێدانێکی بەهێز لە دەرەوەی ناوچەی سزا تۆمارکرد، بەمەش خۆی وەک یەکێک لە گەورەترین سوپرایزەکانی ئامادەکارییەکانی بارسا بۆ وەرزی نوێی 2025-2026 ناساند.

"درۆ"ی تەمەن 17 ساڵ، خاوەنی لێهاتووییەکی هونەریی سەرنجڕاکێشە کە وایکردووە ناوی بەخێرایی لەنێو هاندەرانی تۆپی پێی کەتەلۆنی و جیهانیدا دەنگ بداتەوە، بەتایبەتی کە پەیوەستە بە یانەیەکی گەورەی وەک بەرشەلۆنە و لەژێر سەرپەرشتیی ڕاهێنەری ئەڵمانی، هانسی فلیک، بەڵام سەرەڕای ئەم دەستپێکە هیوابەخشە، واقیعی یاریزانە گەنجەکە وا دەخوازێت کە دوای کۆتاییهاتنی گەشتی ئاسیایی، بگەڕێتەوە بۆ تیمی دووەم (ریدێف)، کە لەوێ لەژێر سەرپەرشتیی ڕاهێنەری نوێی بەرشەلۆنە، جولیانۆ بێلێتی، مەشق و ڕاهێنان دەکات.

ڕەنگە ئەم هەنگاوە بۆ درۆ قورس بێت دوای ئەوەی تامی یاریکردنی بۆ تیمی یەکەم کرد، بەڵام بەڕێوەبەرایەتیی وەرزشیی یانەکە بە سەرۆکایەتیی دیکۆ، بە بەڕێوەبەری کارەکانی، ئیڤان دێ لا پێنیا، دووپاتکردەوە کە پلانێکی پەرەپێدانی درێژخایەن بە وردی بۆ بەهرەکەی ئامادە کراوە، ئەمەش بەپێی ڕۆژنامەی "موندۆ دیپۆرتیڤۆ"ی ئیسپانی.

گرێبەستەکەی درۆ لەگەڵ بەرشەلۆنە تاوەكو ساڵی 2027 درێژەی هەیە، کە گرێبەستێکی نوێیە و لە سەرەتای تەمموزی 2024 واژۆ کراوە.

سەرەڕای ئەوەش، کارگێڕیی یانەکە بەتەواوی لەوە تێدەگات کە پاراستنی ئەم بەهرەیە پێویستی بە باشترکردنی گرێبەستەکەی هەیە لە داهاتوویەکی نزیکدا، چ لە ڕووی داراییەوە بێت یان ماوەکەی، بەتایبەتی لەگەڵ بوونی گرنگیپێدانی زیاتری یانەکانی دیكە کە دەستیان کردووە بە چاودێریکردنی یاریزانەکە.

پلانە دانراوەکە بەشداریکردنی "درۆ" لەنێوان تیمی یەکەم و دووەمدا لەم وەرزەدا لەخۆدەگرێت، کە ئەمەش شتێکی زۆر هاندەرانەیە، بەتایبەتی کە فلیک بە متمانەبەخشی بە گەنجان ناسراوە. هەروەها بوونی بریکارەکەی، دێ لا پێنیا، کە بە بڕیارە ئارام و ژیرانەکانی دوور لە فریودانە داراییەکان ناسراوە، یاریزانەکە زیاتر جێگیر دەکات و ئاڕاستەی سەرکەوتنی دەکات.

داگرتنی ئەپی راچڵەکین بۆ ئەندرۆید

داگرتنی ئەپی راچڵەکین بۆ ئایفۆن