راچڵەكین -

وەزارەتی كارەبای حكومەتی هەرێمی كوردستان رایدەگەیەنێت، لە چوارچێوەی پڕۆژەی ڕووناكی، كارەبای 24 كاتژمێری بۆ نزیكەی 40%ی دانیشتووانی هەرێم دابینكراوەو تا كۆتایی ئەمساڵ كارەبای 24 كاتژمێری دەگاتە هەر چوار پارێزگاكەی هەرێم.

ئەمڕۆ پێنجشەممە 31-7-2025، وەزارەتی كارەبا نوێترین ئاماری تایبەت بە هاووڵاتیان و هاوبەشانی نێو پڕۆژەی ڕووناكی بڵاوكردەوە، كە بەم جۆرەیە:

هەولێر:
• هاوڵاتی: 1,458,000
• هاوبەش: 380,000

سلێمانی:
• هاوڵاتی: 976,500
• هاوبەش: 257,000

دهۆك:
• هاوڵاتی: 288,000
• هاوبەش: 79,000

كۆی گشتی:
• هاوڵاتی: 2,722,500
• هاوبەش:  716،000


وەزارەتەكە ئاشكراتیكردووە، تائێستا زیاتر لە دوو هەزار و 517 مۆلیدەی گازوایل لە گەڕەكەكان كوژێنراونەتەوە، و تا كۆتایی ساڵی 2026یش، حكومەتی هەرێمی كوردستان لە پلانیدایە زیاتر لە حەوت هەزار مۆلیدە بكوژێنێتەوە.

بەپێی ئامارەكەی وەزارەتی كارەبا، كۆی گشتی ژمارەی ئەو مۆلیدانەی كوژێنراونەتەوە لە پڕۆژەی ڕووناكی، بەم جۆرەیە:

هەولێر:
• ژمارەی مۆلیدە: 1,734
• هاوتای ئۆتۆمبیل (لەڕووی دەردانی دوانە ئۆكسیدی كاربۆنەوە): 300,000

سلێمانی:
• ژمارەی مۆلیدە: 518
• هاوتای ئۆتۆمبیل: 90,000

دهۆك:
• ژمارەی مۆلیدە: 265
• هاوتای ئۆتۆمبیل: 46,000

كۆی گشتی:
• ژمارەی مۆلیدە: 2،517
• هاوتای ئۆتۆمبیل: 465،000

حكومەتی هەرێمی كوردستان پێشتر ڕایگەیاندبوو كە هاوڵاتییان كەمترین پارەی كارەبایان دابوو لە پسووڵەكانی مانگی پێنج، ئەمەش دەگەڕێتەوە بۆ نرخە نوێیەكان كەوا بۆ پاراستنی خێزانە كەمدەرامەتەكان و هاندانی هاوڵاتییان بۆ بەكارهێنانی بەرپرسیارانەی كارەباوە داندراون، لەژێر نرخە نوێیەكاندا، 80%ی هاوڵاتییان پارەیەكی كەمتر دەدەن بە كارەبا بەراورد بەو پارەیەی دەیاندا بە هەردوو كارەبای نیشتیمانی و كارەبای مۆلیدە ئەهلییەكان. 

وەزارەتی كارەبا ئاماژەی بەوكردووە، تاوەكو كۆتایی ساڵی 2025، سەنتەری هەر چوار پارێزگای هەولێر، سلێمانی، دهۆك و هەڵەبجە كارەبای 24 كاتژمێریان پێ دەگات.