ڕاچڵەکین سپۆرت -

 

ماسیمیلیانۆ ئالێگری ڕاهێنەری یانەی ئەی سی میلان خۆشحاڵی خۆی بە ئاستی تیپەکەی دەربڕی لە گەشتەکەی پێش وەرزدا و جەختی لەوە کردەوە کە قۆناغە گرنگەکە بە گەڕانەوەی تیپەکە بۆ ئیتاڵیا دەستپێدەکات، کە وەک خۆی دەڵێت "هەموو شتێک دەگۆڕێت".

میلان لە گەشتە هاوینەیەکەی خۆیدا سێ یاری دۆستانەیان ئەنجامدا و یەک یاری بە ئارسناڵ دۆڕاند، بەڵام ئاستێکی بەهێزیان پێشکەش کرد و سەرکەوتنی قەناعەتبەخشیان بەرامبەر لیڤەرپوول و پێرس گلۆری بەدەستهێنا، کە لە کۆتا وێستگەی گەشتەکەدا لەبەردەم جەماوەرێکی زۆری هاندەرانی ڕۆسۆنێریدا لەلایەن تیپی ئیتاڵییەوە بە ئەنجامی 9-0 سەرکەوتنی بەدەستهێنا.

ئالێگری بە ڕۆژنامەی لاگازێتا دیلۆ سپۆرتی ڕاگەیاند: سێ هەفتەی کارکردنی باش بوو، گەشتەکەش لە ڕووی ئاست و ئامادەکارییەوە سەرکەوتوو بووە، بەڵام دەبێت ئەوەمان لەبیربێت کە شتە جدییەکان دوای گەڕانەوەمان دەست پێدەکات، کاتێک ڕۆژی سێشەممە دەست بە ڕاهێنانەکان دەکەینەوە، دەبێت لە ڕووی دەروونییەوە خۆمان ئامادە بکەین، چونکە لەگەڵ نزیکبوونەوەی وەرزەکە هەموو شتێک دەگۆڕێت.

ئاماژەی بەوەشکرد، پێویستە بە ئارامی و هاوسەنگی کاربکەین، بەبێ ئەوەی زۆر گەشبین بین بە سەرکەوتنەکان، وەرزەکە درێژە، بە دڵنیاییەوە ساتە سەختەکانیش دەبینین، یاریزانێکی باش لە مانگەکانی حوزەیران و کانوونی دووەم و شەش مانگ دواتر بەهای خۆی دەسەلمێنێت، لەکاتێکدا یاریزانێکی خراپ بەدرێژایی وەرزەکە بەو شێوەیە دەمێنێتەوە.

یانەی میلان لە 17ی ئاب لە قۆناغی یەکەمی جامی ئیتاڵیا بەفەرمی وەرزی خۆی بەرامبەر باری دەستپێدەکات، پێش ئەوەی لە 23ی ئاب یەکەم یاری خولی ئیتاڵیا بەرامبەر کرێمۆنیزی لە یاریگای سان سیرۆ ئەنجام بدات، هەروەها دوو یاری کۆتایی دۆستانە بەرامبەر لیدز یونایتد لە دبلن و چێڵسی لە لەندەن لە 9 و 10ی ئاب ئەنجام دەدات.

گەڕانەوەی ئالێگری بۆ میلان لە مانگی ئایاری ڕابردوودا دوای زیاتر لە 11 ساڵ دوورکەوتنەوە، سەرنجی زۆری بەدوای خۆیدا هێنا، بەتایبەتی دوای ئەوەی گرێبەستێکی دوو ساڵەی لەگەڵ بژاردەی درێژکردنەوەی گرێبەستەکەی واژۆکرد، ئەمەش لە گواستنەوەیەکدا ئامانجی گەڕانەوەی تیپەکە بوو بۆ شکۆمەندی ناوخۆیی و ئەوروپا.