راچڵەكین -

یەكێتی نووسەرانی جینۆسایدی كوردستان لەبارەی دەستگیركردنی عەجاج-ی جەلادەكەی نوگرەسەلمان، رایدەگەیەنێت، دەستگیركردنی ئەو تاوانبارە گەورەیە، كۆدی نهێنی زۆر دەرگای تر دەكاتەوەو دەمانگەیەنێتە زۆر نهێنی شاراوە، داواش لە كەسوكاری ئەنفالكراوان دەكات لە بەغدا سكاڵا لەسەر سەرۆك جاش و مستەشارە داواكراوەكان تۆمار بكەن.

لەدوای راگەیاندنی هەواڵی دەستگیركردنی عەجاج حەردان تكریتی، كە یەكێكە لە تاوانبارانی ئەنفال، یەكێتی نووسەرانی جینۆسایدی كوردستان راگەیەندراوێكی بڵاوكردەوە.

ڕاگەیاندراوی یەكێتی نووسەرانی جینۆسایدی كوردستان

دەستگیركردنی عەجاج؛ كردنەوەی زۆر كۆدی نهینیە

ئێوارەی ئەمڕۆ هەینی ٢٠٢٥/٨/١، دەزگای ئاسایشی نیشتمانی عێراق، بە فەرمی دەستگیركردنی (عجاج احمد حردان التكریتی)، ڕاگەیاند، كە لەناو گەلی كوردستان بە جەلادەكەی نوگرەسەلمان و دێوەزمەی ناو تاوانی ئەنفالی ناسراوە.

دەستگیركردنی تاوانبارێكی گەورەی وەك عەجاج، كە تەنها ڕزگاربووانی نێو قەڵای نوگرەسەلمان دەتوانن گوزارشت لە تاوان و دڕەندەییەكەی بكەن، هەر چەندە درەنگ وەختەیە، بەڵام هەنگاوێكی گرنگە و كۆدی نهێنی زۆر دەرگای تر دەكاتەوەو دەمانگەیەنێتە زۆر نهێنی شاراوە.

هەر بۆیە لە یەكێتی نووسەرانی جینۆسایدی كوردستان، وێڕای ئەوەی سوپاس و پێزانینی خۆمان بە هەموو دامەزراوە فەرمیەكان ڕادەگەیەنین، كە شوێن پێی زانیارییەكان كەوتوون، تا دواجار دەستگیركردنی ئەو جەلادەی لێهاتە بەرهەم، كە (22) ساڵە لە چنگی یاسا خۆی شاردۆتەوە.. هاوكات داوا دەكەین؛

یەكەم: پرۆسەی دانپێدانان و وەرگرتنی زانیارییەكان لە تاوانبار بە ئامادەبوونی تیمێكی شارەزایی نووسەرانی بواری جینۆساید بەڕێوەبچێت، بە ئامانجی كۆكردنەوەی زانیارییە شاراوەكان، بە تایبەت كە زانراوە عەجاجی تاوانبار بە مەبەستی خۆشاردنەوەی لە دەزگا ئەمنیەكان چەندین ڕێگا و شێوازی بەكارهێناوە، وەك گۆڕینی ڕوخساری لە رێی نەشتەرگەری جوانكاری و گۆڕینی ناوی و بڵاوكردنەوەی پڕوپاگەندەی مردنی له ساڵانی ڕابردوو.

دووەم: دەستگیركردنی ناوبراو بكرێتە سەرەداوی دۆزینەوە تێوەگلاوانی تر لە تاوانی ئەنفال.

سێیەم: داوا لە كەسوكاری ئەنفالكراوان دەكەین، بچن لە بەغدا سكاڵا لەسەر سەرۆك جاش و مستەشارە داواكراوەكان تۆمار بكەن.

لە كۆتاییدا پیرۆزبایی لە سەرجەم كەسوكاری ئەنفالكراوان و ڕزگاربووانی قەڵای نوگرەسەلمان و تەواوی گەلی كوردستان دەكەین بە بۆنەی دەستگیركردنی عەجاجی تاوانبار.

یەكێتی نووسەرانی جێنۆسایدی كوردستان
2025/8/1