راچڵەكین -

لەسەر دۆسیەی كوشتنی خوشكەكەی خۆی، تۆمەتبارێك خۆی ڕادەستی هێزەكانی پۆلیسی سلێمانی كرد.

بەڕێوەبەرایەتی پۆلیسی پارێزگای سلێمانی لە راگەیەندراوێكدا بڵاویكردەوە، دوای ئەوەی نیوەڕۆی ئەمڕۆ شەممە 2-8-2025، هێزەكانی پۆلیس ئاگاداركرانەوە لە بوونی ڕوداوێكی كوشتن لە گەڕەكی شێخ عەبدولقادری چوێسە لەشاری سلێمانی، دەستبەجێ‌ مەفرەزەكانی پۆلیس گەیشتنە شوێنی ڕووداوەكەو كەشف و هێڵكاریی شانۆی تاوان ئەنجامدرا.

لە راگەیەندراوەكەدا ئاماژە بەوەكراوە، بەبڕیاری دادوەر هێزەكانی بەشی پۆلیسی نەهێشتنی تاوان، پۆلیسی فریاكەوتنی سلێمانی و مەفرەزەكانی دەزگای ئاسایشی هەرێم بەدواداچوونەكانیان دەستپێكرد بۆ دۆزینەوەو دەستگیركردنی تۆمەتبار، سەرەنجام تۆمەتبار خۆی ڕادەستی هێزەكانی پۆلیسی سلێمانی كرد.

پۆلیسی سلێمانی ئاشكراشیكردووە، تۆمەتبارەكە ناوی ( ت ، س ،أ )ە، لە ئێستادا بەبڕیاری دادوەرو بەتۆمەتی كوشتنی خوشكەكەی خۆی، بەپێی ماددەی 406 لە یاسای سزادانی عیراقی ڕاگیراوەو لێكۆڵینەوە لە ڕووداوەكە بەردەوامە.