راچڵەكین -

ئاسایشی هەولێر دەستگیركردنی باندێكی سێ كەسی رادەگەیەنێت كە، لەڕێگای دانانی كامێرای نهێنی لەناو شوقەیەك، هەڕەشەی بڵاوكردنەوەی گرتەی ڤیدیۆییان لە چەند هاووڵاتییەك كردووە.
 
لە راگەیەندراوێكدا كە ئەمڕۆ شەممە 2-8-2025 بڵاوكراوەتەوە، بەڕێوەبەرایەتی ئاسایشی هەولێر ئاشكرایكردووە، ‏‎بەفەرمانی دادوەری لێكۆڵینەوەی ئاسایشی هەولێر، سێ تۆمەتبار بە ناوەكانی (ق ، أ ، ع)، (م، غ ، س) و (ف، ف ،ج) دەستگیركران، كە هەڵساون بە گرتنی شوقەیەك لە یەكێك لە پڕۆژەكانی شاری هەولێر و دواتر لەناو ئامێرێكی (بڵندگۆ/ سەماعە) لە ژووری نوستنی شووقەكەیان، كامێرایەكی نهێنییان جێگیركردووە.

وەك لە راگەیەندراوەكەی ئاسایشی هەولێردا هاتووە، تۆمەتبارەكان بەناوی میوانداری، چەند هاووڵاتییەكیان بردووەتەوە بۆ شوقەكەی خۆیان و سەرنجی كەسەكانیان راكێشاوە بەڕێگای بەكارهێنانی چەند ئافرەتێك، وێنەو گرتە ڤیدیۆی زیاتر لە 10 كەسیان بە شێوەی نەشیاو تۆماركردووە، دواتر هەڕەشەی بڵاوكردنەوەی گرتە ڤیدیۆكانیان لەو كەسانە كردووە، لە بەرامبەر بڵاونەكردنەوەیان، داوای بڕێكی زۆر پارەیان كردووە.