راچڵەكین -
بەهۆی ئەو شەپۆلی گەرما بەتینەی كە وڵاتی پۆرتوگالی گرتووەتەوە، زیاتر لە 260 كەس گیانیان لەدەستداوە، حكومەتی ئەو وڵاتەش حاڵەتی ئامادەباشی رادەگەیەنێت.
میدیاكانی پۆرتوگال بڵاویانكردەوە، تائێستا بەهۆی ئەو شپۆلی گەرمایەی كە سەرانسەری وڵاتەكەی گرتووەتەوە، 264 كەس گیانیان لەدەستداوە، كە زۆربەیان كەسانی بەتەمەنن و نەخۆشیی درێژخایەنیان هەیە.
وەزارەتی تەندروستی پۆرتوگال لە راگەیەندراوێكدا بڵاویكردەوە، شەپۆلی گەرماكە كاریگەریی زیاتری لەسەر ناوچەكانی باكووری وڵات هەیە و قوربانییەكانیش لەو ناوچانەن.
هاوكات حكومەتی پۆرتوگال حاڵەتی ئامادەباشیی لە سەرانسەری وڵاتەكە راگەیاندووە، بەتایبەتیش كە بەپێی پێشبینییەكانی كەشناسی، ئەم هەفتەیە پلەكانی گەرما لەو وڵاتە زیاتر بەرزدەبێتەوەو مەترسی دەكرێت دارستانەكانی باكووری وڵاتەكە دووچاری كەوتنەوەی ئاگر ببنەوە، هەربۆیە تیمەكانی بەرگریی شارستانی خراونەتە ئەوپەڕی حاڵەتی ئامادەباشییەوە بەمەبەستی كۆنترۆڵكردنی ئاگرەكان و بەهاناوەچوونی دانیشتووانی ئەو ناوچانەی كە مەترسی ئاگركەوتنەوەی لێدەكرێت.
ئەم دۆخە نالەبارەی پۆرتوگال لەكاتێكدایە پێشبینی دەكرێت رۆژانی ئەم هەفتەیە پلەكانی گەرما بۆ سەروو 40 پلەی سیلیزی بەرزببێتەوە، كە بەرزترین پلەیە لەو وڵاتەدا تۆماركرابێت.