راچڵەكین -

بەڕێوەبەرایەتی گشتی ئۆپراسیۆنەكانی ئاسایش، لەشاری سلێمانی دوو تیرۆریست دەستگیر دەكات، كە پیلانیان داڕشتبوو بۆ ئەنجامدانی تەقینەوە لە یەكێك لە بنكەكانی بەرگری شارستانی.

بەگوێرەی راگەیەندراوێكی دەزگای ئاسایشی هەرێم، بەڕێوەبەرایەتی گشتی ئۆپراسیۆنەكانی دەزگای ئاسایشی هەرێم، دوای بەدواداچوون و لێكۆڵینەوەی وورد و كۆكردنەوەی زانیاری هەواڵگری، لەئەنجامی بڵاوبوونەوەی گرتە ڤیدیۆیەك لە تۆڕە كۆمەڵاتییەكان لەبارەی هەڕەشەكردن و تەقینەوە، دەستبەجێ توانیان لەئەنجامی بەدواداچوونەكان شوێنی تیرۆریستان لەشاری سلێمانی دەستنیشان بكەن و بەفەرمانی دادوەری لێكۆڵینەوەی ئاسایش لەڕۆژی ٢٢تا٢٤ی٢٠٢٥/٦ دەستگیریان بكەن.

لە راگەیەندراوەكەدا ئاماژە بەوەكراوە، هەردوو تیرۆریستەكە، كە یەكێكیان كارمەندی بنكەیەكی بەرگری شارستانی بووە، دوای دانپێدانان دەركەوت كە بەنیاز بوون لەپیلانی یەكەمدا ژەهر بكەنە ناو تانكی ئاوی خواردنەوەی یەكێك لە بنكەكانی بەرگری شارستانی سلێمانی، لەپیلانی دووەمیشدا لەڕێگەی لكاندنی بۆمب بە ئۆتۆمبێلی بنكەكە، تەقینەوە ئەنجام بدەن.

لەئێستادا هەردوو تیرۆریستەكە، دوای شكستهێنانی پیلانەكانیان لەلایەن بەڕێوەبەرایەتی گشتی ئۆپراسیۆنەكانی ئاسایش، بەپێی ماددەی (٢)ی تیرۆر دەستگیركراون و لێكۆڵینەوە لەدۆسیەكانیان بەردەوامە.