ڕاچڵەکین سپۆرت -

 

یانەی پاریس سانجێرمان گەیشتە ڕێککەوتن لەسەر گرێبەستکردن لەگەڵ لۆکاس شیڤالیێری گۆڵپارێزی فەرەنسی لە یانەی لیلەوە، ئەمەش لەکاتێکدایە کە قسە و باس لە داهاتووی جیانلویجی دۆنارۆما بەردەوامە.

بەگوێرەی فابریزیۆ ڕۆمانۆ، شارەزای گواستنەوەی یاریزانان، شیڤالیێر بە گرێبەستێکی پێنج ساڵە پەیوەندی بە یانەی پاریس سانجێرمانەوە دەکات بە بڕی 40 ملیۆن یۆرۆ، بڕیارە لەم هەفتەیەدا پشکنینی پزیشکی ئەنجامبدرێت.

شیڤالیێر وەرزی ڕابردوو لەگەڵ یانەی لیل 48 یاری لە سەرجەم پاڵەوانێتییەکان ئەنجامدا و 13 کلین شیتی هەبوو و 53 گۆڵی لێکرا.

لیل وەرزی ڕابردوو پلەی پێنجەمی خولی فەڕەنسای بەدەستهێنا و وەرزی داهاتووش بەشداری لە خولی یۆرۆپالیگ دەکات.

ئەمەش دوای چەند ڕۆژێک دێت لە هەواڵێکی ڕۆژنامەی RMC Sport کە پاریس سانجێرمان بە نیازە ئەم هاوینە دۆنارۆما بفرۆشێت بۆ ئەوەی دواتر بە خۆڕایی لەدەستی نەدات. هەروەها هەنگاوێکی دیکەیان ناوە بۆ پاڵنانی بەرەو ڕۆشتنی ئەو یاریزانە و پێیان ڕاگەیاندووە کە وەرزی داهاتوو بەهیچ شێوەیەک نابێتە گۆڵپارێزی سەرەکی یانەکە.