راچڵەكین -

ئاسایشی هەولێر تۆمەتبار دەستگیر دەكات كە 100 ئامێری بلوتوزی تایبەت بە گزیكردنی پێبووە و بەنیاز بوو بەر لە دەستپێكردنەوەی خولی دووەمی تاقیكردنەوەكان، لەشاری هەولێر ساغی بكاتەوە.

بەگوێرەی راگەیەندراوێكی بەڕێوەبەرایەتی ئاسایشی هەولێر، كە ئەمڕۆ پێنجشەممە 7-8-2025 بڵاویكردوەتەوە، ‎بە فەرمانی دادوەری لێكۆڵینەوەی ئاسایش، هێزەكانیان تۆمەتبارێكیان بەناوی ( ب ، م ، ف) دەستگیركرد، كە لە قەزای حللەی سەر بە پارێزگای بابل، بە شێوەی قاچاخ 100 ئامێری بلوتوز كە تایبەتە بە (گزی/ غش كردن)ی دەربازی ناو شاری هەولێری كردبوو.

ئاسایشی هەولێر ئاشكرایكردووە، تۆمەتبارەكە بەنیاز بوو بەر لە دەستپێكردنەوەی خولی دووەمی تاقیكردنەوەكانی خوێندكاران، ئەم ئامێرانە لە شاری هەولێر ساغبكاتەوە.