راچڵەكین -
حكومەتی لوبنان بڕیاریدا دیاردەی چەكداری لە دەرەوەی هێزە فەرمییەكان لە وڵاتەكەی كۆتایی پێبهێنێت و هێزەكانی سوپا لەو ناچانەی باشوور بڵاوەپێبكات كە ئێستا پێگەی چەكدارانی حزبوڵڵای لێیە.
ئەمڕۆ پێنجشەممە 7-8-2025، لە كۆبوونەوەیەكدا كە وەزیرەكانی شیعە بایكۆتیان كرد، بڕیاریدا هیچ هێزێكی چەكدار (لەوانەش حزبوڵڵای لوبنانی) لە دەرەوەی هێزە فەرمییەكان نەمێنێت و سەرجەمیان چەك بكرێن و چەك تەنها لەدەست هێزەكانی سوپا بمێنێتەوە.
حكومەتی لوبنان بەكۆی دەنگی وەزیرە ئامادەبووەكان، ئەو رێككەوتنەشیان پەسەندكرد كە تایبەتە بە ئاگربەست لەگەڵ ئیسرائیل و بڵاوەپێكردنی هێزەكانی سوپا لەناوچەكانی باشووری وڵات، كە ئێستای هێزە چەكدارەكانی حزبوڵڵای تاێدا جێگیركراوە.
پێشتر حزبوڵڵای لوبنانی رەتیكردبووەوە لەژێر هیچ بارودۆخێكدا چەك دابنێت و رادەستی سوپای لوبنانی بكات، وەك هەڵوێستێكیش لەدژی دەركردنی بڕیارەكەی ئەمڕۆ، هەر چوار وەزیرەكەی شیعە، كە دوانیان سەر بە حزبوڵڵان و وەزیرێكی بزوتنەوەی ئەمەل و وەزیرێكی شیعەی سەربەخۆ، بایكۆتی كۆبوونەوەكەی حكومەتی لوبنانیان كرد و رایانگەیاند كە پەیوەست نابن بە ناوەڕۆكی بڕیارەكەوە.
لەیەكەم كاردانەوەشدا بەرامبەر بڕیارەكەی حكومەتی لوبنان، تۆم باراك، نێردەی تایبەتی سەرۆكی ئەمریكا بۆ سووریان رایگەیاند: بڕیارێكی راست و دروست و مێژووییە، هەروها هەنگاوێكە بەرەو (یەك نیشتمان و یەك سوپا) لە سەرانسەری لوبنان.