راچڵەكین-
كەناڵی ئەلجەزیرەی قەتەری كوژرانی دوو پەیامنێرو دوو وێنەگری كەناڵەكەی لە كەرتی غەززە بەهۆی بۆردومانی ئیسرائیلەوە راگەیاند.
كەناڵەكە بڵاویكردووەتەوە، ئەنەس شەریف و محەممەد قرەیقەع، شەوی رابردوو لەئاكامی بۆردومانكردنی خێوەتی رۆژنامەنووسان لەنزیك نەخۆشخانەی شیفا لە غەززە لەلایەن سوپای ئیسرائیلەوە بەدرۆن، كوژراون.
هەر بەگوێرەی زانیارییەكانی ئەلجەزیرە، لەو هێرشە درۆنییەدا هەریەك لە ئیبراهیم زاهیر و محەممەد نەوفەل، وێنەگرانی كەناڵەكە كراونەتە ئامانج و ئەوانیش كوژراون.
هاوكات سوپای ئیسرائیل بڵاویكردووەتەوە، " ئەنەس شەریف" سەركردایەتی شانەیەكی " تیرۆرستی" سەر بە بزووتنەوەی حەماسی كردووە كە ئەركیان مووشەكبارانكردنی هاوڵاتیانی مەدەنی ئیسرائیل و سوپاكەی بووە.