راچڵەكین-

پارتی دیموكراتی كوردستان رایدەگەیەنێت، پێویستە چارەسەركردنی جیاوازی و كێشەكان بە ڕێگای دیالۆگ و لێكتێگەیشتن بێت، هەر كار و كاردانەوەیەك كاریگەری خراپی لەسەر سەقامگیری و پێكەوەژیان و ناوبانگی هەرێمی كوردستان هەبێت بەباش نازانین.

ئەمڕۆ دووشەممە 25ی ئابی 2025 مەكتەبی سیاسی پارتی دیموكراتی كوردستان، لەبارەی رووداوەكەی چەند رۆژی رابردووی هۆتێل لالەزار لەسلێمانی راگەیەندراوێكی بڵاوكردەوە.

مەكتەبی سیاسی پارتی لەبەشێكی راگەیەندراوەكەیدا ئاماژەی بەوەكردووە:" لە نیگەرانی و دڵە ڕاوكێی خەڵك تێدەگەین و، لە پێناو هەرێمەكەمان و ئارامی دەروونی هاووڵاتیانی هێژا، داوامان لە هەموو لایەك ئەوەیە دانبەخۆیان دابگرن و پارێزگاری لە سەروەری یاسا و دامەزراوەكان بكەن و، هەر جۆرە گرژی و هێرشێكی میدیایی خزمەت بە هەرێمی كوردستان ناكات و پێویستە ڕابگیرێت. "


  راگەیاندراوێك لە مەكتەبی سیاسیی پارتی دیموكراتی كوردستانەوە
 
ئەنجام و لێكەوتەكانی ڕووداوەكەی بەرەبەیانی ٢٢ـی ئابی ٢٠٢٥ لە شاری سلێمانی، كە بەداخەوە چەندین قوربانی لێكەوتەوە، بونە هۆی نیگەرانی خەڵكی سلێمانی و تەواوی هەرێمی كوردستان.
 
هەرێمی كوردستان قەوارەیەكی دەستووریی و بەرهەمی تێكۆشان و قوربانیدانی چەندین ساڵەی ڕۆڵەكانی گەلی كوردستانە و خاوەنی دامەزراوەی شەرعی و یاساییە، جەخت لە سەروەری یاسا و پاراستنی ئارامی و سەقامگیری شاری ئازیزی سلێمانی بەتایبەتی و هەرێمەكەمان بەگشتی دەكەینەوە.
 
پێویستە چارەسەركردنی جیاوازی و كێشەكان بە ڕێگای دیالۆگ و لێكتێگەیشتن بێت، هەر كار و كاردانەوەیەك كاریگەری خراپی لەسەر سەقامگیری و پێكەوەژیان و ناوبانگی هەرێمی كوردستان هەبێت بەباش نازانین.
 
لە نیگەرانی و دڵە ڕاوكێی خەڵك تێدەگەین و، لە پێناو هەرێمەكەمان و ئارامی دەروونی هاووڵاتیانی هێژا، داوامان لە هەموو لایەك ئەوەیە دانبەخۆیان دابگرن و پارێزگاری لە سەروەری یاسا و دامەزراوەكان بكەن و، هەر جۆرە گرژی و هێرشێكی میدیایی خزمەت بە هەرێمی كوردستان ناكات و پێویستە ڕابگیرێت.   
 
هاوكات، سەرەخۆشی لە خانەوادە و كەسوكاری سەرجەم قوربانییەكان دەكەین و هاوخەمیانین، هیوای زوو چاكبوونەوەیش بۆ برینداران دەخوازین.
 
مەكتەبی سیاسیی 
پارتی دیموكراتی كوردستان
٢٥
ـی ئابی ٢٠٢٥