راچڵەكین-

پسپۆڕێكی ئابووری عیراق هۆكاری بڕیارنەدانی بەغداد لەسەر رەوانەكردنی مووچەی مانگی حوزەیرانی فەرمانبەرانی هەرێمی كوردستان ئاشكرا دەكات.

نەبیل موسەوی، لەهەژماری خۆی بڵاویكردووەتەوە، ئەنجوومەنی وەزیرانی عیراق لەدواهەمین كۆبوونەوەی خۆیدا هیچ باسێكی لە مووچەی فەرمانبەرانی هەرێمی كوردستان نەكرد، هاوكات دۆسێكە بەستراوەتەوە بە رێكەوتنی ئەم دواییەی نێوان ناوەندو هەرێم كە تیایدا ئاماژەكراوە بە رادەستكردنی بڕی 230 هەزار بەرمیل نەوتی رۆژانە كە دواتر دابەزێندرا بۆ 80 هەزار بەرمیل، لەگەڵ 120 ملیار دیناری مانگانە كە دەكاتە 50%ی داهاتی نانەوتی.

موسەوی دەڵێت، هەرێمی كوردستان پێشنیاری كردووە تەنها بۆ ئەم مانگە 120 ملیار دینارەكە رەوانە بكات، لەگەڵ ئەوەشدا تائێستا ئەو بڕەیان رادەست نەكردووە تا مووچە رەوانە نەكرێت، لەبەرامبەردا بەغداد دەڵێت ناتوانن مووچە رەوانە بكەن تا ئەو بڕە پارەیە رادەست نەكرێت.

نەبیل موسەی دەڵێت، هەرێم پێی وایە، حكومەتی عیراق هەوڵدەدات یاسای بەڕێوەبردنی دارایی پێشێل بكات بە داوای (50%)ی سەرجەم داهاتە ناوخۆییەكان لە هەرێمی كوردستان، لەكاتێكدا هەرێم دەیەوێت (50%)ی باج و داهاتەكانی سنور رادەست بكات و، (پارەی خزمەتگوزارییەكان)ی وەزارەتەكان بۆ دابینكردنی خەرجییە ناوخۆییەكانی حكومەتی هەرێمی كوردستان و پێداویستی رۆژانەی هاوڵاتیان تەرخان بكات. 

لە مادەی (٢٩)ی یاسای ئیدارەی دارایی عیراقدا هاتووە كە ئەم داهاتانەی خوارەوە بۆ پارێزگا یان هەرێم تەرخان دەكرێت:

یەكەم: (50%)ی رسومات و باجە فیدراڵییەكان كە لەو فەرمانگانەوە بەدەستدێت لە ناوەندەوە پارەیان بۆ تەرخان دەكرێت، بەبێ ئەو بڕە پارانەی كە لە باج و باجی گومرگییەوە بەدەست دێت.
دووەم: پشكی پارێزگاكان لە دەروازە سنورییەكان و داهاتی پترۆدۆلار.
سێیەم: داهاتە ناوخۆییەكان كە بەپێی یاسا ناوخۆییەكان كۆدەكرێنەوەو لەلایەن ئەنجومەنی پارێزگاوە دەرچووە.
چوارەم: داهاتی تایبەت بە فەرمانگەكانی شارەوانی.