وێنە.. ئەرشیف

راچڵەكین -

لە رۆژئاوای كوردستان هێزەكانی هەسەدەو هاوپەیمانی نێودەوڵەتی بە سەركردایەتی ئەمریكا، مانۆڕێكی هاوبەشی سەربازی ئەنجام دەدەن بە ئامانجی بەهێزكردنی زیاتری هێزی وشكانی و ئاسمانی لەناوچەكەدا.

روانگەی سووری بۆ مافەكانی مرۆڤ بڵاویكردەوە، ئەمڕۆ دووشەممە 11-8-2025، لە بنكەی سەربازیی هاوپەیمانی نێودەوڵەتی لە ناوچەی شەدادی لە گوندەوارەكانی حەسەكەی رۆژئاوای كوردستان، هێزەكانی هەسەدە و هاوپەیمانی نێودەوڵەتی، مانۆڕێكی هاوبەشی سەربازییان ئەنجامدا و تێیدا مەشق و راهێنان لەسەر چەندین جۆر چەكی پێشكەوتوو كرا.

لە راهێنانە سەربازییەكەدا، كە هێزی ئاسمانییش بەشدارییان تێدا كرد، هێزی زەمینی هەسەدەو هاوپەیمانی نێودەوڵەتی مەشق و راهێنانیان لەسەر چۆنیەتی هەڵكوتانە سەر پێگەی سەربازیی دوژمن ئەنجامدا و چەند جۆرێك چەكی نوێ تاقیكرانەوە، كە یەكەم جارە بەكاردەهێنرێت.

لەماوەكانی رابردوودا، چەندین مانۆڕی هاوبەشی سەربازی لە رۆژئاوای كوردستان لەلایەن هێزەكانی هەسەدەو هێزەكانی هاوپەیمانی نێودەوڵەتی ئەنجامدراون، ئەمەش هاوكاتە لەگەڵ بەردەوامیی ناردنی هاوكاری لۆجستیی سەربازی لەلایەن ئەمریكاوە بۆ بنكە سەربازییەكانی لە رۆژئاوای كوردستان.