راچڵەكین -

پۆلیسی هەولێر دەستگیركردنی ئەو تۆمەتبارەی راگەیاند كە بە هەڕەشەكردن پارەی لە شۆفێران وەردەگرت.

بەگوێرەی راگەیەندراوێكی بەڕێوەبەرایەتی پۆلیسی پارێزگای هەولێر، لەسەر سكاڵای هاووڵاتییەك، هێزەكانیان تۆمەتبارێكیان دەستگیركرد كە لەكاتی كەمكردنەوەی خێرایی ئۆتۆمبێلەكان لەسەر تاسەكان یاخود وەستانیان لە ترافیكلایتەكان، بە ماتۆڕسكیل خۆی دەكێشا بە ئۆتۆمبێلی هاووڵاتیاندا و دواتریش دەهاتە خوارەوە و هەڕەشەی لە شۆفێرەكان دەكرد و داوای پارەی لێدەكردن، شوفێرەكانیش بۆ ئەوەی خۆیان لەو كێشەیە ڕزگار بكەن، بڕێك پارەیان پێدەدا.

وەك لە راگەیەندراوەكەی پۆلیسی هەولێردا هاتووە، تۆمەتبارەكە لەمیانی لێكۆڵینەوەدا دانی ناوە بە تاوانەكەیدا، كە چەندین تاوانی لەو شێوەیەی ئەنجامداوە، بە بڕیاری دادوەری لێكۆڵینەوە، ڕاگیراوە و پەڕاوی لێكۆڵینەوەی بۆ كراوەتەوە.