ڕاچڵەکین سپۆرت -

 

لویس ئێنریکی ڕاهێنەری یانەی پاریس سانجێرمان بڕیارێکی سەرسوڕهێنەری سەبارەت بە جیانلویجی دۆنارۆمای گۆڵپارێزی دا.

ڕۆژنامەی لیکیپی فەرەنسی بڵاویکردەوە، دۆنارۆما لە لیستی یاریزانانی پاریس سانجێرمان بۆ یارییەکەی جامی سوپەری ئەوروپا بەرامبەر یانەی تۆتنهام بانگهێشت نەکراوە و دوورخراوەتەوە.

ڕۆژنامەکە ئاماژەی بەوەشکردووە، ئەم بڕیارە ڕەنگە دەرگای ڕۆیشتنی دۆنارۆما لەم هاوینەدا بکاتەوە، دوای ئەوەی ڕەتیکردەوە گرێبەستەکەی درێژ بکاتەوە، کە لە هاوینی 2026 کۆتایی دێت.

گۆڵپارێزە ئیتاڵییەکە و ئارناو تێناسی ئیسپانی، ڕۆژی دووشەممە بەشدارییان لە مەشق و ڕاهێنانی کۆمەڵەکاندا نەکردووە.

هەروەها لە ڕاپۆرتەکەدا ئاماژە بەوە کراوە کە ئێنریکی سێ گۆڵپارێز لە پێکهاتەی جامی سوپەری ئەوروپادا بانگهێشت دەکات، ئەوانیش دوو یاریزانە نوێیەکەی ئەم هاوینە، لوکاس شیڤالیێر و ڕیناتۆ مارین، هەروەها ماتڤی سافۆنۆڤی ڕووسی.

جیانلویجی دۆنارۆما تا ئێستاش یەکێکە لە ئەستێرە دیارەکانی پاریس سانجێرمان و بەشدارییەکی بەرچاوی کرد لە بەدەستهێنانی یەکەم نازناوی چامپیۆنزلیگی تیپەکە.

دۆنارۆما یەکێکە لەو نۆ یاریزانەی پاریس سانجێرمان کە پاڵێوراون بۆ خەڵاتی تۆپی ئاڵتونی باشترین یاریزانی ساڵ.