راچڵەكین -
هێزەكانی سوریای دیموكرات هۆشداریی لە جموجۆڵی گروپە چەكدارییەكانی سەر بە حكومەتی سوریا دەدات و رایدەگەیەنێت: سەرباری دانبەخۆداگرتنمان، بەڵام ئەگەر جموجۆڵەكان بەردەوام بن وەڵامیان دەدەینەوە.
هێزەكانی سوریای دیموكرات راگەیەندراوێكی لەبارەی جموجۆڵە گوماناوییەكانی چەند رۆژی رابردووی هەندێ لە گروپە چەكدارییەكانی سەر بە حكومەتی سوریا بڵاوكردەوەو تێیدا ئاماژەی بەوەكردووە كە چەند رۆژێكە گروپەكانی سەر بە حكومەتی دیمەشق گێچەڵ بە هێزەكانی هەسەدە دەكەن، بەتایبەتی لە دەوروبەری شارۆچكەی دێرحافر و گوندەوارەكانی ئەو سنوورە و بەردەوامن لە پێشێلكردنی ئاگربەست.
هەسەدە ئاشكراشیكردووە، هاوكات لەگەڵ ئەو جموجۆڵانە، فڕۆكە بێفركەوان بەشێوەیەكی بەردەوام بە ئاسمانی هەردوو گەڕەكی ئەشرەفییە و شێخ مەقسود لەشاری حەڵەب دەسوڕێننەوە و گروپی دیكەی چەكداری لە دەوروبەری ئەو دوو گەرشەكە كوردنشینە كۆبوونەوە.
لە بەشێكی دیكەی راگەیەندراوەكەدا، هەسەدە باسی لەوەكردووە كە سەرباری ئەو جموجۆڵە گوماناوییانە، بەڵام هێزەكانیان پابەندن بە دان بەخۆداگرتن و وەڵامیان نەداوەتەوە، بەڵام ئەگەر بەردەوام بن لە بەئامانجگرتنی هێزەكانیان، ناچار دەبن لەسەر بنەمای بەرگری لەخۆكردن، وەڵامیان بدەنەوە.
هێزەكانی سوریای دیموكرات داوای لە دسەڵاتدارانی دیمەشق كردووە هەڵسوكەوتی ئەو گروپە چەكدارییە لەیاسا دەرچووانە كۆنتڕۆڵ بكات، بۆ ئەوەی نەبنە هۆی داڕمانی ئەو رێككەوتن و لێكتێگەیشتنانەی كە لەنێوانیاندا واژۆ كراون.