راچڵەكین-

پۆلیسی سۆران دەستگیركردنی 10 دەرۆزەكەری راگەیاند كە:" منداڵی بچوكیان بەكارهێناوە بە مەبەستی دەرۆزەكردن."

ئەمڕۆ پێنجشەممە 21ی ئابی 2025  بەڕێوەبەرایەتیی پۆلیسی سۆران بڵاویكردەوە:" مەفرەزەی پۆلیسی چالاكییە مەدەنییەكانی رەواندوز هەستاون بە دەستگیركردنی زیاتر لە 10 دەرۆزەكەر لە شاری رەواندوز كە لە شەقام و شوێنە گشتییەكان هاوڵاتییانیان بێزاركردووە."

ئاماژە بەوەشكراوە:" ئەو دەرۆزەكەرانە منداڵی بچووكیان بەكارهێناوە بۆ راكێشانی هەست و سۆزی خەڵك بەمەبەستی دەرۆزەكردن."

وەك لەراگەیەندراوەكەی پۆلیسدا هاتووە، بە بڕیاری دادوەری لێكۆڵینەوەی رەواندوز، پەڕاوی لێكۆڵینەوەیان بۆ كراوەتەوە و بەپێی ماددەی 390 لە یاسای سزادانی عیراقی راگیراون.