دەرباز كۆسرەت رەسوڵ: رێبازی مام جەلال دەكەینە بەرنامەی كاركردنمان

کوردستان

1 رۆژ پێش ئێستا     ژمارەی بینراو 201

راچڵەكین -

دەرباز كۆسرەت رەسوڵ رایدەگەیەنێت: یەكێتی تێكڕای تەمەنی خەباتكردن بووە بۆ بەدیهێنانی دیموكراسی بۆ گەلانی عیراق و هەرێمی كوردستان، تەنها بەیەكەوەش دەتوانین داهاتووی كۆمەڵگەكانمان سەقامگیر بكەین لەڕێگەی جێگیركردنی بەها دیموكراسییەكان و بەدیهێنانی ئاشتی و دادپەروەری بۆ هەمووان.

ئەمڕۆ پێنجشەممە 28-8-2025، دەرباز كۆسرەت رەسوڵ، ئەندامی بۆردی هاوپەیمانی پێشكەوتنخوازی حزبە سۆسیال دیموكراتەكان و سەرۆكی چوارچێوەی سیاسیی یەكێتیی نیشتمانیی كوردستان لە رێكخراوە نێودەوڵەتییەكان، لە كۆنگرەی هاوپەیمانیی سۆشیال دیموكرات لە جیهانی عەرەبیدا، وتاری یەكێتیی نیشتمانیی كوردستانی پێشكەش كرد.

دەقی وتارەكە:

بەناوی یەكێتیی نیشتمانیی كوردستان و لیژنەی باڵای رێكخستنی كۆنفرانس بەخێرهاتنی سەرجەم میوانە بەڕێزەكان، شاندەكان، سەركردەی پارتە سیاسییەكان و هەڤاڵان لە سەرانسەری جیهانی عەرەبی و دەرەوە  دەكەین. 

بەخێربێن بۆ كۆنفرانسی سۆسیال دیموكرات لە جیهانی عەرەبیدا، ئامادەبوونتان لێرە نیشانەی هاودەنگی و هاوهەڵوێستی هەموومانە بەرامبەر  بە خەباتی دیموكراسی و حوكمرانی باش. 

ئەمڕۆ سلێمانی و هەرێمی كوردستان باوەشیان بۆ رووداوێكی مێژوویی گەورە كردۆتەوە لە مێژووی خەباتی ناوچەكە لەپێناو دیموكراسییدا. ئەم میواندارییە سلێمانی دەكاتە قەڵایەكی گەورە لەسەر ئاستی رۆژهەڵاتی ناوەڕاست بۆ پاراستنی پرەنسیپە دیموكراسییەكان و پێشەنگكردنی خەباتی مەدەنی. 

پێزانینێكی قوڵمان هەیە بۆ  دەستنیشانكردن و متمانەدان بە سلێمانی بۆ بەڕێوەچوونی كۆنفرانسەكە، ئەمە نیشانەی زیندوویی سلێمانییە، هەروەها دەرخەری گرنگی پێگەی سیاسی هەرێمی كوردستانیشە لەچوارچێوەی خەباتی دیموكراتیدا.

سەرمەشقی ئەم دەستكەوتە مێژووییە بۆ هەرێمی كوردستان بە شانازییەوە یەكێتیی نیشتمانیی كوردستانە، كە تێكڕای تەمەنی خەباتكردن بووە بۆ بەدیهێنانی دیموكراسی بۆ گەلانی عێراق بەگشتی و هەرێمی كوردستان بە تایبەتی. دەمانەوێ لەرێگەی ئەم كۆنفرانسەوە هەرێمی كوردستان بخەینە سەرنەخشەی خەباتی دیموكراسی.

مێژوو سەلماندوویەتی یەكێتی توانیوییەتی ببێتە دەنگێكی زیندووی خەباتی مەدەنی خەڵكی هەرێمی كوردستان لە كۆمەڵگەی نێودەوڵەتیدا، لەم چوارچێوەیەدا یەكێتیی نیشتمانیی كوردستان ئەندامێكی كارای دوو هاوپەیمانی زۆر گرنگە، ئەوانیش هاوپەیمانی پێشكەوتووخواز، لەگەڵ هاوپەیمانی سۆسیال دیموكرات لە جیهانی عەرەبیدا. 

دیدگای رابردوو و ئێستا و ئایندەی یەكێتی بریتیە لە؛ بنیاتنانی كۆمەڵگەیەكی دیموكراسی و ‌ فەراهەمكردنی ئازادی بۆ تاك، دادپەروەری بۆ كۆمەڵگە. یەكێتی لەهەر كوێ بێت، ئەوا لەوێ مافەكانی ژنان بەتەواوی پارێزراوە، گەنجان بەوپەڕی توانای خۆیان خزمەتیان كردووە، پێكەوەژیانی ئاشتیانە بەرزترین بەهای هەبووە.

یەكێتیی نیشتمانیی كوردستان هەر لەیەكەم رۆژی دامەزراندنیەوە خەبات بۆ ئازادی و دیموكراسی و مافی چارەی خۆنوسین لە بەها نەگۆرەكانی بووە. رۆڵێكی كاریگەری هەبووە لەسەر دامەزراندنی سەرجەم ئەم دامەزراوانەی كار بۆ بەدیهێنانی حوكمڕانی باش دەكەن.

لەڕێگەی ئەو كۆنفرانسەوە دەمانەوێ بڵێین سۆسیال دیموكرات بیرێكی زیندووە و هەمیشە نوێدەبێتەوە، مام جەلال كە رێبەرێكی دیاری ئەم بیرەیە، بڕوای تەواوی هەبوو بە كاركردن لەپێناو ئاشتی و سەقامگیری، رێبازی مام وەك میراتێكی سیاسی بۆمان دەمێنێتەوە و دەیكەینە بەرنامەی كاركردنمان. 

ئێمەی یەكێتی هاوشانی هەموو پارتە سۆسیال دیموكراتەكان، بەردەوام كار لەسەر برەودان بە كەلتوری دیالۆگ و دانوستانی ئاشتیانە دەكەین. هەر پرۆژەیەكی ئاشتی بزانین دەبێتە مایەی سەقامگیری بۆ ژیانی هاوڵاتیان، ئێمە بەوپەری توانامانەوە پشتگیری دەكەین. 

ئەنجامدانی ئەم كۆنفرانسە لەم ساتەدا بۆ هەموومان گرنگە، چونكە لە قۆناغێكی هەستیارداین، گۆرانكاری جیۆپۆلیتیكی بەرچاو روویانداوە، پێشهات و هەرەشەی ئەمنی نەخوازراو رووی لەناوچەكە كردووە، جەنگ و كوشتار و ماڵوێرانی ماندوو و نیگەرانی كردووین‌، بۆیە هەموومان پێویستمان بە هاوكاریی ناوچەیی هەیە بۆ رووبەرووبونەوەی ئەو ئاستەنگە هاوبەشانەی رووبەرووی هەموومان دەبێتەوە.

نوێنەری سەرجەم پارت و بزوتنەوە و رەوتە سیاسییەكان...

دەرفەتێكی زێرینمان هاتۆتە پێش، ئێمەی هێزە پێشكەوتنخوازەكان و ئەندامانی سۆسیال دیموكرات، دەست لەناو دەست، لەڕێگەی سوود وەرگرتن لە ئەزموونی یەكتر، هەر یەكەمان سیستەمی حوكمڕانی لە ووڵاتەكانمان لەسەر بنەما دیموكراسیەكان بنیات بنێین. 

با ئەم كۆنفرانسە بكەینە پردێك بۆ ئەوەی خەباتمان لەپێناو دیموكراسی لە سنورێكی بەرتەسكدا نەمێنێتەوە، چونكە سەركەوتنی پرۆسەی دیموكراسی لەهەر ووڵاتێك، دەبێتە دەستكەوتێك بۆ هەمووان، وەك چۆن شكست و پاشەكشەی دیموكراسی بۆ هەموومان مایەی نیگەرانییە.

ئایندە لەدەست خۆمانە، ئێمە خۆمان بریاردەدەین كۆمەڵگەو سیستەمی حوكمرانیمان بەرەو كێ بروات. دەتوانین داهاتوویەكی نوێ بۆ نەوەی تازە بنیات بنێین لەسەر بنەمای یەكسانی و ئازادی و دادپەروەری كۆمەڵایەتییەوە. هیوادارین لەم كۆنفرانسەدا سەرجەم كۆبوونەوەو گفتوگۆكان بەرهەمداربن. 

هیوادارم لە رۆژانی كۆنفرانس كاتێكی خۆش لە كەشی رۆشنبیری و ئارامی سلێمانی بەسەر ببەن. 

بەم میوانداریكردنەی سلێمانی و یەكێتی، پەیامی ئەوە دەگەیێنین كەوا دیموكراسی و ئاشتی بەردی بناغەی گەشەسەندن و ئاسایشن، تەنها لە كوردستان نا، بەڵكو لەهەموو ناوچەكەو جیهانیش.

لە كۆتایییدا  دووبارە بەخێرهاتنی گەرمی ئێوەی ئازیز دەكەم و دەمەوێ ئەوە دوپات بكەمەوە كەوا (تەنها بەیەكەوە دەتوانین داهاتووی كۆمەڵگەكانمان سەقامگیر بكەین لەڕێگەی جێگیركردنی بەها دیموكراسییەكان و بەدیهێنانی ئاشتی و دادپەروەری بۆ هەمووان.

داگرتنی ئەپی راچڵەکین بۆ ئەندرۆید

داگرتنی ئەپی راچڵەکین بۆ ئایفۆن