راچڵەكین -
سەرۆكایەتی دادگای تێهەڵچوونەوەی ناوچەی سلێمانی، روونكردنەوە لەبارەی كەسێك دەدات كە خۆی بە دادوەر ناساندووە و ئەو سیفەتەی بۆ "بەرژەوەندی تایبەتی خۆی" بەكارهێناوە، راشیدەگەیەنێت: سكاڵای یاسایی لەسەر ئەو كەسە و هەر كەسێكی هاوشێوە تۆمار دەكەین بەتۆمەتی بەكارهێنانی نازناوی دادوەر بەشێوەیەكی ناڕاست.
ئەمڕۆ پێنجشەممە، 28-8-2025، سەرۆكایەتی دادگای تێهەڵچوونەوەی ناوچەی سلێمانی روونكردنەوەیەكی بڵاوكردووەتەوەو تێیدا هاتووە "لەهەندێك تەلەفزیۆن و دەزگای میدیایی، چاوپێكەوتن و لێدوانی كەسێك بڵاودەكرێتەوە بەناوی (سامان سەید عەتار) كە گوایە دادوەرە و وەكو دادوەر لێدوان دەدات، وە لە شوێنانی تریش خۆی بە دادوەر ناساندووە و ئەو سیفەتەی بۆ بەرژەوەندی تایبەتی خۆی بەكارهێناوە.
لە بەشێكی دیكەی روونكردنەوەكەدا هاتووە، ئاگاداری هەموولایەك دەكەینەوە كە ئەو كەسە دادوەر نییە و سەربە هیچ دامودەزگایەكی دادوەری نییە، نە ئێستا و نە لە ڕابردووش دادوەر نەبووە، بۆیە قبوڵكراو نییە هیچ دەزگایەكی میدیایی وەكو دادوەر بیناسێنێت، وە ئێمە وەكو سەرۆكایەتی دادگای تێهەڵچونەوەی ناوچەی سلێمانی سكاڵای یاسایی لەسەر كەسی ناوهاتوو و هەركەسێكی هاوشێوە تۆمار دەكەین بەتۆمەتی بەكارهێنانی نازناوی دادوەر بەشێوەیەكی ناڕاست.