راچڵەكین -
ئاسایشی سلێمانی دەستگیركردنی چوار تۆمەتبار رادەگەیەنێت، كە لە پارێزگای دهۆك هاووڵاتییەكیان كوشتبوو و بەمەبەستی خۆحەشاردان روویان لە سلێمانی كردبوو.
بەگوێرەی راگەیەندراوێكی بەڕێوەبەرایەتی ئاسایشی پارێزگای سلێمانی، چوار تۆمەتباری هەڵاتوو لەیاسا، لە یەكێك لە هۆتێلەكانی شاری سلێمانی، لەلایەن هێزەكانیانەوە دەستگیركران، كە بەمەبەستی خۆحەشاردان ڕوویان لە سلێمانی كردبوو.
وەك لە راگەیەندراوەكەدا هاتووە، ئەو چوار تۆمەتبارە، لەساڵی ٢٠٢٤ لەپارێزگای دهۆك لەسەر كێشەی كۆمەڵایەتی هاوڵاتییەكیان كوشتووە و هەڵاتوون، بەڕێوەبەرایەتی ئاسایشی پارێزگای سلێمانی، لە ٢٠٢٥/٨/١٩ دوای چاودێری و بەدواداچوون و كۆكردنەوەی زانیاری، بەبڕیاری دادوەری لێكۆڵینەوەی ئاسایش، توانیان هەر چوار تۆمەتبار دەستگیر بكەن.
لەئێستادا تۆمەتباران بە ماددەی (٤٠٦) لەیاسای سزادانی عێراقی، ڕاگیراون و بەپێی تایبەتمەندی كەیسەكەیان، ڕادەستی بەڕێوەبەرایەتی پۆلیسی پارێزگای دهۆك دەكرێنەوە.