راچڵەكین-
رێبەری زیندانیكراوی پارتی كرێكارانی كوردستان جەختلەوەدەكات "كۆمەڵگەی دیموكراسی، ئاشتی و یەكگرتن" سێ چەمكی سەرەكی پرۆسەی چارەسەرین.
ئەمڕۆ هەیینی 29ی ئابی 2025 شاندی دەم پارتی بۆ ئیمراڵی كە دوینێ هەیینی سەردانی عەبدوڵا ئۆجەلان-یان كرد، پەیامی نوێی رێبەری زیندانیكراوی پەكەكەیان بۆ رای گشتی بڵاوكردەوە.
وەك لەراگەیەندراوەكەی شاندەكەی دەم پارتی-دا هاتووە:"لە 28ی ئابی 2025 لە ئیمرالی کۆبونەوەیەکی سێ کاتژمێریمان لەگەڵ بەڕێز ئۆجەلان ئەنجامدا، تەندروستی عەبدوڵا ئۆجەلان زۆر باش بووەو ورەیەكی بەرزی هەبووە."
ئۆجەلان لەبارەی هەڵوێستی خۆی بەرامبەر پرۆسەی چارەسەری، بە شاندی دەم پارتی راگەیاندووە:" كێشەكەی ئێمە وەك برینێكی قووڵ بووە كە پێویستی بە نەشتەرگەرییەكی تایبەت هەیە."
ئۆجەلان ئاماژەی بەوەكردووە: "ئامانجمان ئەوە بوو كە هەموو هەوڵێك بدەین بۆ كۆتاییهێنان بە پڕۆسەیەكی پڕ ئازار."
ئۆجەلان جەختی لەوەشکردووە، هەمیشە تەواوكاری لەسەر بنەمای کۆماری دیموکراتی و کۆمەڵگەی دیموکراسی بەلاوە پەسەندەو تێگەیشتن و لە ئامێزگرتنی ئەم هەنگاوە ستراتیژییە سودی بۆ هەموومان و هەموو تورکیا دەبێت.
"رەخنەی لەو شێوازە گرتووە كە هەندێك لە سیاسەتمەداران و رۆژنامەنووسان مامەڵە لەگەڵ ئەم هەڵبژاردەیەدا دەكەن، بەوەی كە بە شێوازێكی پشتگوێخستن زیان بە پڕۆسەكە دەگەیەنێت." لە راگەیەندراوەكەی شاندی ئیمراڵی دا هاتووە.
لە كۆتایی شاندەكە باس لەوە دەكەن ئۆجەلان، "دووبارە جەختی لەسەر باوەڕی گەورەی بە دۆستایەتی هەمیشەیی و ئاشتیی نێوان گەلان كردەوە."