راچڵەكین-

ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی، هەڵەبجە و هەردوو ئیدارەی راپەڕین و گەرمیان، داهاتی ئەم هەفتەیەی بڵاوكردەوە.

بەگوێرەی ئەو داتایانە بێت كە ماڵپەری شەفافیەت بڵاویكردوونەتەوە، داهاتی نانەوتی سلێمانی، هەڵەبجە و هەردوو ئیدارەی راپەڕین و گەرمیان لە 23تا 29ی ئابی  2025 ، بڕی (16) ملیارو (119)ملیۆن و (249)هەزار و (189)دینار بووە، لە (93%)ـی داهاتەكە نەختینەیە و (7%)ی بەشێوەی چەك بووە.

داهاتەكە بەراورد بە هەفتەی رابردوو بەرێژەی  26.785% كەمیكردووە كە دەكاتە بڕی 5 ملیار دینار، بەجۆرێك داهاتی نانەوتی لە 16تا 22ی ئابی 2025 بریتیی بوو لە (22) ملیارو (16) ملیۆن و (377) هەزارو (884) دینار.

ماڵپەڕی شەفافیەت لە 8 بەش پێكدێت و لەلایەن نووسینگەی قوباد تاڵەبانی جێگری سەرۆكی حكومەت سەرپەرشتی دەكرێت و دروشمەكەی "بە سیستمكردن و دیجیتاڵكردنی خزمەتگوزارییەكانی هاووڵاتییان لە دامودەزگاكانی حكومەت"ـە.