وێنە.. ئەرشیف

راچڵەكین -

سوپای ئەمریكا، كاروانێكی دیكەی كەلوپەلی سەربازیی لە هەرێمی كوردستانەوە رەوانەی رۆژئاوای كوردستان دەكات كە ژمارەیەكی زۆر كەرەستەی پێشكەوتووی سەربازیی لەخۆدەگرێت.

روانگەی سووری بۆ مافەكانی مرۆڤ بڵاویكردەوە، ئەمڕۆ هەینی 29-8-2025، كاروانێكی سەربازیی سوپای ئەمریكا، كە لە 20 بارهەڵگر پێكهاتبوو، لە هەرێمی كوردستانەوە بە دەروازەی سنووری وەلید، گەیشتە بنكەی سەربازیی قەسرەك لە باكووری پارێزگای حەسەكە لە رۆژئاوای كوردستان.

كاروانە سەربازییەكە چەندین جۆر چەك و كەرەستەی پێشكەوتووی سەربازی لەخۆگرتووە، هەندێ لە بارهەڵگرەكانیش، داپۆشرابوون و نەزانراوە چ جۆرە كەرەستەیەكی باركردبوو، شەوی رابردووش ئەمریكا لەڕێیگەی فڕۆكەی بارهەڵگری سەربازییەوە، بڕێكی زۆر چەك و تەقەمەنیی پێشكەوتوو گەیاندە بنكە سەربازییەكە.

لەماوەكانی رابردوودا، هێزەكانی هاوپەیمانی نێودەوڵەتی بە سەركردایەتی ئەمریكا، چەندین كاروانی لۆجستیی رەوانەی بنكە سەربازییەكانی لە رۆژئاوای كوردستان كردووە، ئەمەش هاوكاتە لەگەڵ مانۆڕە سەربازییە هاوبەشەكانی ئەمریكا لەگەڵ هێزەكانی هەسەدە لەناوچەكانی رۆژئاوای كوردستان وەك ئامادەكارییەك بۆ هەر دۆخێكی لەناكاوی سەربازی لە ناوچەكەدا.