راچڵەكین -

دەستەی سەربەخۆی مافی مرۆڤ داوا لە خانەوادەی ئەو كەسانەی كە ئەندامی هێزی دووپشك بوون و ئێستا لای ئاسایشی سلێمانی راگیراون، رۆژانی یەكشەمەو دووشەمەی داهاتوو دەتوانن سەردانی كوڕەكانیان بكەن.

ئەمڕۆ هەینی 29-8-2025، دەستەی سەربەخۆی مافی مرۆڤ لە راگەیەندراوێكدا بڵاویكردەوە، لەبەردەوامی هەوڵەكانیان بۆ سۆراغكردنی ئەو كەسانەی تائێستا چارەنوسیان دیار نەبووە، یان سەردانیان نەكردوون، خانەوادەی ئەو كەسانە ئاگاداردەكەینەوە كە ئەندامی هێزەكانی دووپشك بوون و لە شەڕەكەی ٢٢ی ئاب لە لالەزار بەشداربوون و ئێستا لای ئاسایشی سلێمانی راگیراون، دوای هەماهەنگیكردن لەگەڵ دەزگای ئاسایشی گشتی/ سلێمانی، ئاگاداریان كردینەوە كە ڕۆژانی یەكشەمەو دووشەمەی داهاتوو  (٣١_٨ و ١_٩ / ٢٠٢٥) كەسوكاریان دەتوانن سەردانی كوڕەكانیان بكەن.

رۆژی چوارشەممەی رابردوو، دەستەی سەربەخۆی مافی مرۆڤ ناوی 15 چەكداری هێزی دووپشكی بڵاوكردەوە، كە سۆراغیان نەبوو، داواشی لە كەسوكاریان كردبوو كە دەتوانن سەردانیان بكەن لە ئاسایشی سلێمانی.