راچڵەكین-

گردبوونەوەیەكی مەدەنی لەعیراق داوای دورخستنەوەی 12 حزب دەكات لەهەڵبژاردنی ئەنجوومەنی نوێنەران بەهۆی ئەوەی" گروپی چەكداریان" هەیە.

دادگای باڵای فیدراڵی عیراق، كۆمسیۆنی باڵای هەڵبژاردنەكان و فەرمانگەی پارت و رێكخراوە سیاسیەكان، بە فەرمی سكاڵای گردبونەوەی سەربەخۆیی- یان وەرگرتووە( گردبوونەوەیەكی مەدەنی) بۆ رێگریكردن لەبەشداریكردنی 12 حزبە لەهەڵبژاردنەكانی داهاتوو بە پاساوی ئەوەی گروپی چەكداریان هەیە.

لەنێو ئەو حزبانەی گردبوونەوەی سەربەخۆی داوایكردووە رێگریان لێبكرێت لەبەشداریكردن لەهەڵبژاردنەكان ( عەسائبیی ئەهلی هەق، بابلیون، رێكخراوی بەدر، كەتایبی ئیمام عەلی، سەید ئەلشوهەدا‌)و چەند گروپێكی تر.

عەباس فەتلاوی، یەكێك لەو پارێزەرانەی سكاڵاكەیان بەرزكردوەتەوە لە چاوپێكەوتنێكدا لەگەڵ میدیاكانی عیراق رایگەیاندووە:" بە پشتبەستن بە مادەی 9ی دەستور و مادەكانی 8 و 47 لە یاسای 2015ی حزبە سیاسیەكان، لە 27ی ئاب سكاڵاكەمان تۆماركردوە و داوای دورخستنەوەی ئەو حزبانەمان كردووە لە هەڵبژاردنەكان، لە 2ی ئەیلول داوای فەرمانی سالاریمان كردوە بۆ راگرتنی ئەو حزبانە."

وتیشی:" كۆمسیۆن ئاگاداری كردووینەتەوە لە ماوەی (10) رۆژدا ئەنجامی سكاڵاكە رادەگەیەنرێت، بەڵام تا ئێستا هیچ رووینەداوە، بۆیە تەنها لەبەر ئەم هۆكارە روومان لە میدیا كردوە نەك لە پێناو نمایشی میدیایی."