راچڵەکین-

دەزگای ئاسایشی هەرێمی کوردستان وردەکاری دەستگیرکردنی دوو بازرگانی ماددەی هۆشبەر لە وڵاتی سعودییە بڵاودەکاتەوە.

دەزگای ئاسایشی هەرێم لە راگەیەندراوێکدا ئاماژەی بەوەکردووە: ئەو دوو بازرگانە ماوەی شەش ساڵە لە رێگەی کۆمپانیای حەج و عومرەوە کە خۆیان خاوەندارێتی دەکەن، کاری بازرگانی ماددەی هۆشبەر دەکەن.

دەقی راگەیەندراوەکەی دەزگای ئاسایش:

دوای بەدواداچوونی ورد و کۆکردنەوەی زانیاری لەلایەن بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم و بەهەماهەنگی لەگەڵ بەڕێوەبەرایەتی نەهێشتنی ماددە هۆشبەرەکانی عێراق و ووڵاتی سعودیە، لەسەر دوو گەورە بازرگانی ماددەی هۆشبەر، کە خەڵکی پارێزگای (صلاح الدين )و خاوەنی کۆمپانیای تایبەت بە حەج و عومرەن و ماوەی ٦ ساڵە  کاری بازرگانی ماددەی هۆشبەریان کردووە لەنێوان عێراق  و سعودیە و تورکیا و چەند ووڵاتێکی کەنداو. بازرگانان لەڕێگەی پاسەکانەوە ماددەکانیان بەشێوازێکی شاراوە و بەتەکنیکی جۆراوجۆر گواستۆتەوە.
ئەم چالاکییە بەهاوکاری و زانیاری بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم و بەهەماهەنگی باڵا لەگەڵ بەڕێوەبەرایەتی گشتی بەرەنگاربوونەوەی ماددەی هۆشبەر لەووڵاتی سعودیە لەشاری (مەدینە) ئەنجامدرا، توانرا دوو گەورە بازرگانی ماددەی هۆشبەر دەستگیربکرێن و دەستبەسەر بڕی ( ١٤٢ )کیلۆگرام ماددەی ( کریستاڵی شل ) بگیرێت.
دوای ئەنجامدانی لێکۆڵینەوەکان دەرکەوت کە ماددە هۆشبەرەکان لەدەروازەی سنوری (عەر عەر) گەیەنراوەتە ناو خاکی ووڵاتی سعودیە.