راچڵەكین-

بەرپرسانی ئیسرائیل، حیزبولای لوبنان تۆمەتبار دەكەن بە دەستكردنەوە بە بونیاتنانەوەی ژێرخانی سەربازی لە بەیروت و باكوری رووباری لیتانی.

دەستەی پەخشی ئیسرائیل (كان) لەزاری بەرپرسانی باڵای ئەو وڵاتە بڵاویكردووەتەوە:" ئەگەر بێتو حیزبوڵای لوبنانی بەردەوام بێت لە پتەوكردن و بەرزكردنەوەی ئاستی تواناكانی، ئەوا شوێنێكی ئارام نامێنێت بۆ ئەو حیزبە."

راپۆرتەكەی ( كان) ئاماژەی بەوەكردووە:" ئیسرائیل چاودێری تواناكانی حیزبوڵا دەكات لە باكوری رووباری لیتانی و ئەو ناوچانەی تر كەلەژێر كۆنترۆڵیدان، لەكاتێكدا چەند ئاماژەیەك هەن كە ئەو حیزبە كار دەكات بۆ بونیاتنانەوەی سیستمی بەرگری و هێرشبەری خۆی."

لەهەمان كاتدا ئیسرائیل، حكومەتی لوبنان تۆمەتبار دەكات بە كەمتەرخەمیكردن لەبەرامبەر پێشێلكاریەكانی حیزبوڵا و هۆشداریداوە لەوەی :" ئەگەر بارودۆخەكە بەو شێوەیە بەردەوام بێت ئەوا ناچار تەلئەبیب پەنا بۆ وەڵامی راستەوخۆ ببات."

هاوكات چەند سەرچاوەیەكی دبلۆماسی ئەمریكا بە سكای نیوز-یان راگەیاندووە:" واشنتۆن پشتیوانی لەهەوڵەكانی چەكداماڵینی حیزبوڵاو سەرجەم گروپە لەیاسا دەرچووەكانی لوبنان دەكات" لەهەمان كاتدا ئامادەكاری بۆ هەموو ئەگەرێك كردووە ئەگەر هاتوو حكومەتی بەیروت شكستی هێنا لەو پرۆسەیە.