راچڵەكین -
وەزارەتی دەرەوەی سووریا روونكردنەوە لەبارەی ئەو زانیارییانە دەدات كە باس لە ئامادەكاریی ئەمریكا دەكات بۆ دامەزراندنی بنكەیەكی سەربازیی لە نزیك دیمەشق و رایدەگەیەنێت: ئەو دەنگۆیانە ناڕاستن و هیچ هەوڵێكیش بەو ئاڕاستەیە نییە.
ئاژانسی هەواڵەكانی سووریا لە سەرچاوەیەكی وەزارەتی دەرەوەی وڵاتەكەی بڵاویكردەوە، ئەو زانیاریانەی باس لە ئامادەكارییەكانی ئەمریكا بۆ كردنەوەی بنكەیەكی سەربازیی لە دیمەشق-ی پایتەخت دەكات، زانیاری ناڕاست و دەنگۆی بێ بنەمان.
بەوتەی سەرچاوەكە، ئەمریكا هەڵوێستی بەرامبەر سووریا گۆڕاوەو دەیەوێت راستەوخۆ مامەڵە لەگەڵ حكومەتی دیمەشق بكات و پاڵپشتی لە هەوڵەكانیش دەكات بۆ یەكسختنەوەی وڵات و رەتكردنەوەی هەوڵەكان بۆ دابەشكاریی.
پێشتر ئاژانسی رۆیتەرز بڵاویكردبووەوە، ئەمریكا ئامادەكاریی دەكات بۆ دامەزراندنی بنكەیەكی سەربازیی ئاسمانی لە دیمەشق-ی پایتەختی سووریا و گوشارەكانیشی چڕكردووەتەوە بۆ سەرخستنی رێككەوتنی ئەمنی لەنێوان سووریا و ئیسرائیل.
ئاژانسەكە ئاشكرایكردووە، ئامانج لە دامزراندنی بنكە سەربازییەكەی ئەمریكا بۆ چاودێریكردنی جێبەجێكردنی رێككەوتنە ئەمنییەكەی نێوان دیمەشق و تەلئەڤیڤ-ە، كە بڕگەیەكی رێككەوتنەكە تایبەتە بە دیاریكردنی ناوچەیەكی لەچەك داماڵدراو لە باشووری سووریا.