راچڵەكین -
قوباد تاڵەبانی لەمیانی سەردانەكەی بۆ چەمچەماڵ، چەند بڕیارێك بۆ هاوكاریكردنی زیانلێكەوتووانی لافاوەكە و دڵنیابوونەوە لە دووبارەنەبوونی رووداوی هاوشێوە دەدات.
ئەمڕۆ پێنجشەممە، قوباد تاڵەبانی، جێگری سەرۆكی حكومەتی هەرێمی كوردستان، سەردانی چەمچەماڵی كرد و ئەو خێزانانەی بەسەركردەوە كە بەهۆی لافاوەوە زیانیان بەركەوتووە.
قوباد تاڵەبانی رایگەیاند: قەبارەی وێرانكاری و زیانەكانی لافاوەكەی رۆژی ڕابردوو دڵتەزێنە، لە دڵەوە پرسە و سەرەخۆشی لەو خێزانانە دەكەم كە ئازیزانیان لەدەستداوەو پشتیوانی تەواوی ئەو ئازیزانەش دەبم كە بەهۆی ئەم كارەساتەوە زیانیان بەركەوتووە.
جێگری سەرۆكی حكومەت وتیشی:" بۆ هاوكاریكردنی زیانلێكەوتووان و دڵنیابوونەوە لە دووبارەنەبوونی رووداوی هاوشێوە، دوو فەرمانی بەپەلەمان دەركردووە.
یەكەیەكی فریاكەوتنی خێرای مرۆیی و چاكبوونەوەمان دامەزراندووە و ئەركدارە بە:
- دابینكردنی خێرای پێداویستییەكان بۆ زیانلێكەوتووان، وەك شوێنی حەوانەوە و خۆراك و ئاوی پاك و پشتیوانیی پزیشكی.
- هەماهەنگ كردنی چالاكییەكانی حكومەت و ئاسایش و كەرتی تایبەت و ڕێكخراوە ناحكومییەكان.
- ئاساییكردنەوەی خزمەتگوزارییەكان و ژێرخانی پێویست.
- تۆماركردنی خێزانە ئاوارەكان و گەیاندنی هاوكاری.
- دروستكردنی هەماهەنگی لەنێوان هەموو تیمەكانی فریاكەوتنی ناوخۆیی و ناوچەیی.
- ئامادەكردنی پلانێكی ڕوون بۆ چاككردنەوە و چۆنییەتی بەرەنگاربوونەوەی قەیرانی هاوشێوە لە هەفتەكانی داهاتوودا.
قوباد تاڵەبانی راشیگەیاند: هەروەها لیژنەی لێكۆڵینەوەمان پێكهێناوە تا بە شێوەیەكی زانستی لێكۆڵینەوە لە كەمتەرخەمییەكان و چۆنییەتی گرتنەبەری رێوشوێنی پێویست بۆ رێگریكردن لەم جۆرە رووداوانە لە داهاتوودا بكات.
جێگری سەرۆكی حكومەت وتیشی:" ئەمڕۆ سەرنجمان لەسەر یارمەتیدانی گەلەكەمانە. سبەینێ بەدوای ڕاستییەكاندا دەگەڕێین و لێپرسینەوە لە هەر كەمتەرخەمییەك دەكەین. خەڵكی چەمچەماڵ، شۆڕش، پیریادیەكان و گەرمیان دڵنیا دەكەینەوە كە بە تەنها جێیان ناهێڵین و لەگەڵیان دەبین تا ئەو كاتەی دڵنیا دەبینەوە لە ئاسایی بوونەوەی دۆخە".