راچڵەكین -

مەكتەبی سیاسی یەكێتیی نیشتمانیی كوردستان، سووربوونی خۆی لەسەر پێكهێنانی حكومەتێكی دادپەروەری خزمەتگوزاری نیشتمانیی دووپاتدەكاتەوەو راشیدەگەیەنێت: لەسەر ئەو بنەمایە دەرگای گفتوگۆی بنیاتنەرانەمان كراوەیە.

ئەمڕۆ سێشەممە 23-12-2025، ‎مەكتەبی سیاسیی یەكێتیی نیشتمانیی كوردستان، بە سەرپەرشتی بافڵ جەلال تاڵەبانی، لەدەباشان، كۆبووەوە.

بەگوێرەی راگەیەندراوێك كە وێنەیەكی دەست راچڵەكین كەوتووە، لە كۆبوونەوەكەدا بە وردی پرسەكانی پێكهێنانی هەردوو حكومەتی فیدراڵ و حكومەتی هەرێمی كوردستانی تاوتوێكرا و پەیوەست بەپێكهێنانی حكومەتی هەرێم، مەكتەبی سیاسی سووربوونی یەكێتی لەسەر پێكهێنانی حكومەتێكی دادپەروەری خزمەتگوزاری نیشتمانیی نیشاندا؛ لەسەر ئەو بنەمایەش، یەكێتی دەرگای گفتوگۆی بنیاتنەرانەی كراوەیە.

‎لە بەشێكی دیكەی راگەیەندراوەكەدا هاتووە، لەبارەی پێكهێنانی حكومەتی فیدراڵیش، لە كۆبوونەوەكەی مەكتەبی سیاسیدا، تەئكید كرایەوە لەوەی یەكێتی مەبەستییەتی لەبەغدادیش حكومەتێكی خزمەتگوزاریی نیشتمانیی پێكبهێنرێت، كە تێیدا ماف و شایستە دەستوورییەكانی گەلەكەمان پارێزراو بێت و گوزارشت بكات لە خواستی هەموو پێكهاتەكانی وڵات، ئەمەش لەسۆنگەی تێڕوانیی دروستیی یەكێتییەوەیە، كە بەغداد قوڵایی ستراتیژی هەرێمی كوردستانە. بۆ ئەو مەبەستەش، گفتوگۆ و كۆبوونەوەكانی یەكێتی نیشتمانیی كوردستان، بەردەوامدەبێت، لەگەڵ سەرجەم لایەنەكاندا.