راچڵەكین-

مەكتەبی سیاسی یەكێتی نیشتمانی كوردستان دەڵێت، رۆژی ٩-٢-٢٠٠٤ بووە مێژوویەكی پرشنگدار لە خەباتی بێوچانی سەرۆك مام جەلال و یەكێتیی نیشتمانیی كوردستان و گەلی كورد.

مەكتەبی سیاسی یەكێتیی نیشتمانیی كوردستان لە یادی رۆژی "مورافەعە مەزنەكەدا " پەیامێكی بڵاوكردەوە.

وەك لەپەیامەكەی مەكتەبی سیاسی یەكێتیدا هاتووە:"ئەمڕۆ (٩-٢)بە سەربەرزییەوە یادی ئەو رۆژە دەكەینەوە كەسەرۆك مام جەلال بە نەخشەو بەڵگەی مێژووییەوە كوردستانی بوونی كەركوكی سەلماندەوە."
 
"لەو رۆژەی ساڵی ٢٠٠٤دا سەرۆك مام جەلال لەپاڵ هەڵگرتنی هەموو خەمە نیشتمانیی و نەتەوەییەكانی گەلەكەیدا، خەمی دیاریكردنی چارەنوسی ئەو ناوچانە بوو كە بەر پەلامارەكانی تەعریب و ڕاگواستن كەوتبون، بۆ سەندنەوەی مافی خاوەنە رەسەنەكانی ئەو ناوچانە و دیاریكردنی سنووری هەرێمی كوردستان لە ناو عیراقیكی فیدراڵدا دەیویست بە بەڵگەی جوگرافی و مێژوویی مۆركێكی قانونیان پێ ببەخشێت."

مەكتەبی سیاسی یكێتی لەبەشێ:ی تری پەیامەكەیدا ئاماژەی بەوەكردووە:" ئەوەی سەرۆك مام جەلال لەو رۆژەدا ئەنجامیدا  بووە بەردی بناغەی مادەی 58 ی قانونی  ئیدارەی دەوڵەت و دواتریش مادەی 140 ی دەستور كە تایبەت بوو بە نەخشەرێی یەكلاكردنەوەی چارەنووسی ئەو ناوچانەی رژێمی شۆڤێنی بەعس بۆ شێواندنی دیموگرافیا لە كەركوك و چەند ناوچەیەكی ناوەڕاست و باشوری عیراقیش گرتبویە بەر ."

"رۆژی ٩-٢-٢٠٠٤ بووە مێژوویەكی پرشنگدار لە خەباتی بێوچانی سەرۆك مام جەلال و یەكێتیی نیشتمانیی كوردستان و گەلەكەمان، كە بۆ چارەسەری گشت كێشەیەكی خاوەندارێتی  خاك و مافەكانی گەلی كورد، هەمیشە بژاردەی گفتوگۆ و پێسەلماندنی دروستی دوور لەشەڕ،  پەنا بردنە بۆ زمانی لێكتێگەیشتن و گفتوگۆ و پشت بەستنە بە سەرچاوە و بەڵگە نامە مێژوییەكان ."

"یادی سەرۆك مام جەلال بەرز و درەوشاوەبێت و خەباتی سەربەرزی گەلەكەشمان بۆ مافە دەستورییەكانی بە پێی نەخشەرێی مادەی ١٤٠ی دەستوور تا سەركەوتنی یەكجاری درێژەی دەبێت." وەك لە كۆتایی پەیامەكەی مەكتەبی سیاسی یەكێتی نیشتمانی كوردستاندا هاتووە.