راچڵەکین-
بەڕێوەبەرایەتی پۆلیسی سلێمانی بڵاویکردەوە: مەفرەزەکانی نوسینگەی نەهێشتنی
تاوانی دزینی ئۆتۆمبێلی سەر بە بەشی پۆلیسی نەهێشتنی تاوان بە هاوکاری نوسینگەی
نەهێشتنی تاوانی ئیبراهیم ئەحمەد و بنکەی پۆلیسی سورداش، دوو تۆمەتباریان
دەستگیرکرد کە هێرشیانکردبووە سەر هاوڵاتییەک و ئۆتۆمبێلەکەیان دزیبوو.
ئاماژەی بەوەشکرد: هاوڵاتییەکە لە هەولێرەوە بە مەبەستی گەشتکردن هاتووەتە
سلێمانی و بەهۆی نەشارەزابوونیەوە پرسیاری دۆزینەوەی شوێنێکی لە دوو تۆمەتبارەکە
کردبوو.
باسی لەوەشکرد: دوو تۆمەتبارەکە چووبوونە ناو ئۆتۆمبێلی هاوڵاتییەکە و واپیشانیان
دابوو کە هاوکاری دەکەن، بەڵام شۆفێرەکەیان بردبووە شوێنێکی چۆڵ و هێرشیانکردبووە
سەری و ئۆتۆمبێلەکەیان دزیبوو.
پۆلیسی سلێمانی ئاشکراشیکردووە: تۆمەتبارەکان ناویان (ش.ب.ل) و (م.د.ا)ە و
هەردووکیان لەدایکبووی 2004ن و لە ئێستادا بە بڕیاری دادوەر راگیراون.