راچڵەكین -

لە قەزای چەمچەماڵ تۆمەتبارێك لەلایەن پۆلیسەوە دەستگیركرا كە زیاتر لە 113 ملیۆن دیناری لە ماڵێ: دزیبوو.

بەگوێرەی راگەیەندراوێكی بەڕێوەبەرایەتی پۆلیسی پارێزگای سلێمانی، دوای ئەوەی هاوڵاتییەك لە نوسینگەی چەمچەماڵی بەشی پۆلیسی نەهێشتنی تاوان، سكاڵای تۆماركرد كە دز چووەتە سەر ماڵەكەیان و قاسەی پارەكانیانی دزیوە كە بڕی (113 ملیۆن دینار و 300 دۆلاری ئەمریكی) تێدا بووە، بڕیاری دادوەر بۆ دۆسیەكە وەرگیراو دەستبەجێ نوسینگەی چەمچەماڵی نەهێشتنی تاوان لێكۆڵینەوەكانیان دەستپێكردو سەرەنجام و بەسوود وەرگرتن لەكامێراكانی چاودێری و سەرچاوەكانیان، توانرا تۆمەتبارێك بەناوی (ع، ع، ع) لەدایكبووی 2004 دەستگیر بكرێت.

تۆمەتبارەكە دانی بەتاوانەكەیدا ناوەو لەئێستادا بەبڕیاری دادوەرو بەپێی ماددەی 443 لەیاسای سزادانی عیراقی، راگیراوەو لێكۆڵینەوە لەدۆسیەكە بەردەوامە.