راچڵەكین -

سێ وڵاتی گەورەی ئەوروپا ئامادەیی خۆیان بۆ دەستپێكردنەوەی دانوستانەكان لەگەڵ ئێران نیشان دەدەن بەئامانجی گەیشتن بە رێككەوتن لەبارەی بەرنامە ئەتۆمییەكەی ئەو وڵاتە.

ئەمڕۆ هەینی 23-10-2026، یۆهان ڤادیفول، وەزیری دەرەوەی ئەڵمانیا، لە لێدوانێكی رۆژنامەوانیدا رایگەیاند: وڵاتانی ئەڵمانیا، فەرەنسا و بەریتانیا ئامادەیی خۆیان نیشانداوە بۆ دەستپێكردنەوەی دانوستانەكان لەگەڵ ئێران سەبارەت بە بەرنامە ئەتۆمییەكەی ئەو وڵاتە.

وتیشی:" ئامانجی ئەو سێ وڵاتەی ئەوروپا لە دەستپێكردنەوەی دانوستانەكان، گەیشتنە بە رێككەوتن لەگەڵ ئێران بۆ چارەسەركردنی پرسی بەرنامە ئەتۆمییەكەی و رێگریكردن لەوەی تاران دەستی بە چەكی ئەتۆمی بگات".

ئەم هەڵوێستە نوێیەی ئەڵمانیا، فەرەنسا و بەرتیانیا، لەكاتێكدایە دەسەڵاتدارانی ئێران رایانگەیاندووە كە بەهیچ شێوەیەك سازش لەسەر بەرنامە ئەتۆمییەكەیان ناكەن بۆ بەكارهێنان لە بواری ئاشتیدا، جەختیان لەوەشكردووەتەوە كە بەنیاز نین چەكی ئەتۆمی بەرهەمبهێنن.