راچڵەكین
وەزارەتی ئەوقافی هەرێم لەسەر ئەو گرتە ڤیدیۆیە دێتەدەنگ كە لەناوچەیەكی هەرێمی كوردستان تۆماركراوەو دەردەكەوێت كە مانگ بینراوە، وتەبێژی وەزارەتەكەش دەڵێت: لە هیچ ناوچەیەكی هەرێمی كوردستان مانگ نەبینراوەو سكاڵاش لەسەر ئەو كەسە تۆماردەكەین كە ڤیدیۆكەی بڵاوكردووتەوە.
نەبەز ئیسماعیل وتەبێژی وەزارەتی ئەوقاف و كاروباری ئایینی حكومەتی هەرێمی كوردستان، بە میدیاكانی یەكێتی راگەیاندووە: هەموو ئەو دەنگۆیانە رەتدەكەینەوە كە باس لە بینینی مانگ دەكرێت لە قەزای سۆران لە هەرێمی كوردستان.
وتیشی: لیژنەی بینینی مانگ دوای ئەوەی ئێوارەی ئەمڕۆ ٢٢-٥-٢٠٢٠ چاودێری بینینی مانگیان كرد و نەبینرا، رایانگەیاند كە سبەینێ تەواوكەری مانگی رەمەزانە و یەكشەممە دەبێتە یەكەم رۆژی جەژنی رەمەزان.
لەبارەی ئەو گرتە ڤیدیۆیەی لە قەزای سۆران بڵاوبووەتەوە، وتەبێژی وەزارەتی ئەوقاف ئاماژەی بەوەكرد كە سەرچاوە گرتە ڤیدیۆكە دیار نییە كوێیەو وتی:" بە دڵنیاییەوە مۆنتاج كراوەو ڤیدیۆی رابردووە، بۆیە وەزارەتی ئەوقاف بە مافی خۆی دەزانێت كە سكاڵا تۆمار بكات لەسەر ئەو كەسانەی كە دەیانەوێت ئاشتی كۆمەڵایەتی بشێوێنن".