نەخۆشی سیڤەر

ڕاچڵه‌كین-

نەخۆشی سیڤەر یەکێکە لە هۆکارە هەر باوەکانی ئازار لە پاژنەی منداڵ و تازە پێگەیشتووەکاندا، دكتۆر هێمن پزیشکی نەخۆشییەکانی جومگە و ڕۆماتێزم زیاتر له‌سه‌ر ئه‌م نه‌خۆشییه‌ له‌م بابه‌ته‌دا باسده‌كات.

ئه‌م نه‌خۆشییه‌ بریتیە لە هەوکردنی پلێتی گەشە لە ئێسقانی پاژنەی پێدا، نەخۆشی سیڤەر بەهۆی فشاری دووبارە و بەردەوام بۆ سەر ئێسقانی پاژنەی پێ درووست دەبێ.

ئەو منداڵ و هەرزەکارانە زیاتر توشدەبن کە بەشدارن لەو جۆرە وەرزشانەی کە ڕاکردن و بازدانی زۆری تێدایە وەکو تۆپی پێ،هەرچەندە ئەو منداڵانەی کە وەرزشیش ناکەن لەوانەیە توش ببن،بەتایبەت ئەوانی کە تۆزێ قەڵەون یان پێڵاوی  تەخت و ناتەندروست لە پێدەکەن.

لەزۆربەی حاڵەتەکاندا تەنها پشوودان بەکارهێنانی چەند جۆرێک دەرمانی ئازار شکێن و پێڵاوی پاژنە نەرم و تەندروست هەروەها هەندێک جۆری وەرزش و لێکشاندن چارەسەری نەخۆشیەکە دەکات.