هیندستان؛ چوار هەزار کەسی دیکە بە کۆرۆنا گیانیان لە دەستدا

جیهان

14/05/2021     ژمارەی بینراو 86

راچڵەکین-

 لە ٢٤ کاتژمێری رابردوودا، چوار هەزار کەس لە هیندستان بە ڤایرۆسی کۆرۆنا گیانیان لەدەستداوە.

وەزارەتی تەندروستیی هیندستان راگەیەندراوێکی بڵاوکردووەتەوە و دەڵێت، لە ٢٤ کاتژمێری رابردوودا، چوار هەزار کەس بەو پەتایە گیانیان لەدەستداوە، ٣٤٣ هەزار و ١٤٤ حاڵەتی تووشبوون بە پەتاکە تۆمارکراوە.

هیندستان کە لەسەر ئاستی جیهان زۆرترین حاڵەتی تووشبوون و گیانلەدەستدان بەو پەتایە تۆمار دەکات، تا ئێستا ٢٤ ملیۆن و ٤٦ هەزار و ٨٠٩ کەس تووشی ڤایرۆسەکە بوون، کۆی ژمارەی ئەو کەسانەی بەو پەتایە گیانیان لەدەستداوە بەرزبووەتەوە بۆ ٢٦٢ هەزار و ٣١٧ کەس.

هاوکات چارەسەرکردنی سێ ملیۆن و ٧٠٤ هەزار و ٨٩٣ تووشبووی دیکە درێژەی هەیە.

هیندستان کە ژمارەی دانیشتوانەکەی نزیکەی ١،٤ ملیار کەسە، لە ١٦ی کانوونی دووەمەوە کەمپینی وەرگرتنی ڤاکسینی کۆرۆنا بەڕێوەدەبات و، تا ئێستا ١٧٩ ملیۆن و ٢٩٨ هەزار و ٥٨٤ کەس ڤاکسینیان وەرگرتووە، بەڵام هێشتا نەگەیشتووەتە ئەو ئاستەی پەتاکە راگرن.

داگرتنی ئەپی راچڵەکین بۆ ئەندۆرید

داگرتنی ئەپی راچڵەکین بۆ ئایفۆن