دوو خوشك لەرۆژهەڵاتی كوردستان ئەشكەنجە دەدرێن

کوردستان

27/07/2021     ژمارەی بینراو 2197

راچڵەكین-

دوو خوشك لەرۆژهەڵاتی كوردستان، بەهۆی ئەوەی براكەیان كەلەوڵاتی نەرویج دەژی و لەرۆژنامەكانی ئەو وڵاتە بابەت بڵاودەكاتەوە، لەلایەن هێزەكانی ئیتڵاعاتی ئێرانەوە ئەشكەنجە دراون و داوایانلێكراوە براكەیان رازی بكەن واز لەچالاكییەكانی بهێنێت. وەك رێكخراوی مافی مرۆڤی هەنگاو بڵاویكردووەتەوە.

رێكخراوەكە ئاماژەی بەوەكردووە:" لە رۆژانی رابردوودا ئیدارەی ئیتلاعاتی شنۆ دوو خوشكیان بەناوەكانی "هاجەر ئەرسزادە" تەمەن ٤١ ساڵ و " كولسووم ئەرسزادە" تەمەن ٣٨ ساڵیان بانگ كرد و ماوەی هەشت كاتژمێر لێكۆڵینەوەیان لێ كردن و ئازار و ئەشكەنجەیان داون."

"بە وتەی سەرچاوەیەكی نزیك لە بنەماڵەی ئەرسزادە، هێزەكانی ئیدارەی ئیتلاعاتی شنۆ لە ساڵانی رابردوودا بەردەوام ئەو دوو خوشكەیان بانگ كردووە و داوایان لێ كردوون كە گوشار بێنن بۆ براكەیان كە لە وڵاتی نەرویج ڕۆژنامەنووسە، واز لە چالاكییەكانی بهێنێت."

هەنگاوە بڵاویكردووەتەوە:" دوایین جارێ كە ئەو دوو خوشكە بۆ ئیدارەی ئیتلاعات بانگ كراون داوایان لێ كراوە تا نووسراوەیەك واژۆ بكەن، ئەوانیش لەو كارە خۆیان بواردووە و بەو هۆیەوە كەوتوونەتە ژێر ئازار و ئەشكەنجەی ئیتلاعات بە شێوەیەك كە باسك و دەستی هاجەر تووشی برینی قورس بووە."

سنار ئەرسزادە تەمەن ٣٩ ساڵ و خەڵكی شنۆ، ساڵی ٢٧١١ (٢٠١١) وەك پەنابەر چۆتەوە وڵاتی نەرویج و لە رۆژنامەكانی Friheten, Radikal portal و Utrop چالاكی هەیە و رووداوەكانی كوردستان لەم رۆژنامانە رووماڵ ئەكات. ناوبراو هەروەها ساڵی ٢٠١٥ یەكەمین كتێبی خۆی بە ناوی "هەتاوی تاریك لە سەر ئاسمانی كۆڵانە تەنگەكان" بڵاو كردۆتەوە.

داگرتنی ئەپی راچڵەکین بۆ ئەندۆرید

داگرتنی ئەپی راچڵەکین بۆ ئایفۆن