راچڵەكین –
شاندێكی یەكێتیی نیشتمانیی كوردستان بە سەرۆكایەتی بافڵ تاڵەبانی، سەردانی بزوتنەوەی گۆڕانی كردو بەگوێرەی راگەیەندراوێك، هاوسەرۆكی یەكێتی روونیكردەوە رایگەیاندووە كە بزوتنەوەی گۆڕان بە شەریكی راستەقینەی خۆیان دەزانن و وەك ھاوبەشێكی سیاسی گرنگ دەیانەوێت پێكەوە ئاڕاستەی سیاسی بگۆڕن و داكۆكی لەمافەكانی گەلەكەمان بكەین.
ئەمڕۆ 13-10-2021، شاندێكی باڵای یەكێتی، بە سەرۆكایەتی بافڵ تاڵەبانی و ئەندامیەتی هەریەك لە رەفعەت عەبدوڵا، بڕیاردەری دەستەی كارگێڕی، شاڵاو كۆسرەت رەسوڵ، دكتۆر سۆران جەمال تاھیر ئەندامی مەكتەبی سیاسی، سالار سەرحەد، ئەندامی سەركردایەتی و ئەژی ئەمین، سەردانی گردی زەرگەتەیان كرد لەلایەن عومەر سەید عەلی، رێكخەری گشتی بزوتنەوەی گۆڕان و ژمارەیەك ھەڵسوڕاو پێشوازیكران.
بەگوێرەی راگەیەندراوێك كە وێنەیەكی بۆ راچڵەكین نێردراوە، لەدانیشتنێكدا گفتوگۆكرا لەبارەی دەرئەنجامەكانی ھەڵبژاردن و پەیوەندییەكانی یەكێتی و گۆڕان و خۆئامادەكردن بۆ ئەگەر و پێشھاتەكان.
بافڵ تاڵەبانی لە دیدارەكەدا روونیكردەوە یەكێتی، بزوتنەوەی گۆڕان بە شەریكی راستەقینەی خۆی دەزانێت و وەك ھاوبەشێكی سیاسی گرنگ دەمانەوێت پێكەوە ئاڕاستەی سیاسی بگۆڕین و داكۆكی لەمافەكانی گەلەكەمان بكەین.
هاوسەرۆكی یەكێتی وتیشی: دەمانەوێت پێكەوە پرۆژەی نوێمان ھەبێت و بەدیدێكی نوێوە كاربكەین بۆ كوردستانەكەمان.
راشیگەیاند، ئەو كورسیانەی هاوپەیمانی كوردستان بەدەستیھێناوە بەرھەمی ھەوڵی گۆڕان و یەكێتی بوو كە بەو ژمارە كاندیدەوە دەچێتە بەغدا بۆ داكۆكیكردن لە بەرنامەی كوردستانیی و زامنكردنی شایستە دارایی و سیاسییەكانی كوردستان بە ناوچە دابڕاوەكانیشەوە، ئەركی داكۆكیكردنی لە مافەكانی گەلی كوردستانی گرتۆتە ئەستۆ و بە یەكریزی هاوپەیمانی لەگەڵ نوێنەرایەتی دیكەی كورد دەتوانین خۆشگوزەرانی زیاتر و ئارامی دابینبكەین.
ھەر لەدیدارەكەدا بافڵ تاڵەبانی روونیكردەوە لەژیانی سیاسیدا حیزب بەزۆر ھەورازو نشێودا دەڕوات بەڵام گرنگ ئەوەیە یەكێتی و گۆڕان لەچوارچێوەی ھاوپەیمانی كوردستان بەرە و پرۆژەی سیاسی ھەنگاوبنێین و خەونی كاك نەوشیراون و سەرۆك مام جەلال جێبەجێبكەین بۆ گۆڕینی سیستەمی سیاسی و پرۆژەی ھاوبەشیشمان ھەبێت بۆ چاكسازی و زیاتر خزمەتكردنی خەڵك و گۆڕانكاریی ریشەیی لە ئیدارەدان، بەڕێوەبردن، چارەسەركردنی كەموكوڕییەكان، گلەیی و رەخنەكانی كۆمەڵانی خەڵكیش بەھەند وەربگرین و بیكەینە دەستمایەی سەركەوتنی داھاتوومان.
ھاوسەرۆك دووپاتیشكردەوە لەگەڵ براكانیان لە گۆڕان پێكەوە دەمێننەوە و كار بۆ ئایندەیەكی گەشتر دەكەن.