راچڵەکین -
زۆر کەس هەوڵ دەدەن بەردەوام بن لە وەرزش کردن و شێوازی ژیانیان تێک نەدەن، بەڵام تینویەتی و هیلاک بوونی رۆژوو، بەربەستی سەرەکیە لەبەردەمیان، کە واز لە وەرزشیش دەهێنن دوای رەمەزان کێشیان زیاد ئەکات و لیاقەیان نامێنێ.

ئەگەر کەسێک بیەوێت بە رۆژ وەرزش بکات وا باشە عەسرێکی فێنک و سەعاتێک پێش بەربانگ وەرزشێکی سووک بکات وەکو رۆیشتن و وەرزشی سویدی و ئامێری راکردن، نابێت وەرزشی قورس و بەرز کردنەوەی قورسایی بکات.

لەکاتی رۆژوو شکاندن پێویستە ئاو و شلەمەنی زۆر بخواتەوە، لە نێوان بەربانگ و پارشێو بەلایەنی کەمیەوە ۳ لیتر ئاو بخواتەوە. بۆ بەربانگ شۆربای نیسک زۆر بەسوودە، چونکە بڕێکی باش لە پڕۆتین و کاربۆهیدرات ی تیایە.

خواردنی مۆز و خورما بۆ وەرزشەوان زۆر باشن، چونکه دەوڵەمەندن بە پۆتاسیۆم کە ماندویەتی و شەکەتی و گرژبوونی ماسولکەکان دوای وەرزش کردن کەم ئەکەنەوە.

پێویستە سەوزە و میوە و شەربەت و شیر زۆر بخورێتەوە بەڵام دوور کەونەوە لە خواردنەوەی چا و قاوە و بیبسی کە لێدانی دڵ زیاد ئەکەن و میزپێکەرن و جەستە ووشک ئەکەنەوە.

وا باشه دوورکەونەوە لە وەرزش کردنی لەبەر تیشکی خۆر و لە کاتی نیوەڕوان بۆ ئەوەی ووشک نەبنەوە و گورچیلەیان زیانی پێ نەگات.، وەرزش کردن بۆ ماوەیەکی درێژ (لە سەعاتێک زیاتربێ) شەکرەی خوێن زۆر دائەبەزێنی و دوور نیە زیان بە مێشک و دڵ بگەیەنێت.

تا دوو کاتژمێریش دوای بەربانگ وەرزش کردن تەندروست نیە، چونکە لەوکاتەدا جەستە سەرقاڵی گەدە و ریخۆڵەکانە بۆ هەرس کردنی خواردن و دەستکەوتنی وزە و ناپرژێتە سەر وەرزش کردن!

د.داهات حەوێزی
پزیشکی پسپۆری هەناوی و شەکرە