راچڵەكین -
مەكتەبی سیاسی یەكێتیی نیشتمانیی كوردستان، لەپەیامێكدا بەبۆنەی 24ەمین ساڵڕۆژی دامەزراندنی رێكخراوی ئازادیی لاوانی كوردستان، رایدەگەیەنێت: ئەو رێكخراوە لە رێگەی پڕۆژە و چالاكییەكانییەوە، رۆڵی گەورەی بینیوە لە گەشەپێدانی هۆشیاریی لاوان و هێنانەدی خەونەكانیاندا.
مەكتەبی سیاسی یەكێتی لە پەیامێكدا كە ئاڕاستەی سكرتاریەتی رێكخراوی ئازادیی لاوانی كوردستانی كردووە، هیوای خواستووە لە ئایندەی نزیكدا رێكخراوەكە بەداڕشتنی بەرنامەی كاری سەردەمیانە و سەركردایەتیی خوێنی نوێوە، كۆنگرەی خۆی ببەستێت و بەگوڕوتینی زیاتر لە جاران، خەبات بكات و ببێتە خەونی گشت لاوان لە تەواوی كوردستاندا.
دەقی پەیامەكە:
بەرێزان سكرتێرو ئەندامانی سكرتاریەتی رێكخراوی ئازادیی لاوانی كوردستان
بەبۆنەی بیست و چوارەمین ساڵیادی دامەزراندنی رێكخراوەكەتانەوە، پیرۆزبایی گەرمتان لێدەكەین و هیوای سەركەوتن و بەردەوامیتان بۆ دەخوازین لە خزمەتكردنی زیاتری لاواندا.
وەك چۆن لە خەبات و تێكۆشانی سیاسیدا یەكێتیی نیشتمانیی كوردستان هەل و بواری بۆ پێشەنگی و سەركردایەتیكردنی لاوان رەخساندوە، هەر لەو روانگەیەوە بووە رێكخراوی ئازادیی لاوانی كوردستان بە جۆرێك دەرفەتی كاری بۆ رەخساوە كە لە مێژووی تەمەنی پڕ كۆششی خۆیدا و لە رێگەی پڕۆژە و چالاكییەكانییەوە رۆڵی گەورەی بینیوە لە گەشەپێدانی هۆشیاریی لاوان و هێنانەدی خەونەكانیاندا.
هیوادارین لە ئایندەی نزیكدا رێكخراوی ئازادیی لاوان بەداڕشتنی بەرنامەی كاری سەردەمیانە و سەركردایەتیی خوێنی نوێوە كۆنگرەی خۆی ببەستێت و بەگوڕ و تینی زیاتر لە جاران خەبات بكات و ببێتە خەونی گشت لاوان لە تەواوی كوردستاندا.
مەكتەبی سیاسی
یەكێتیی نیشتمانیی كوردستان