راچڵەكین -
وەزارەتی خوێندنی باڵا بڕیاریدا بۆ ساڵی خوێندنی (2023 - 2024) داشكاندن لە كرێی خوێندنی زانكۆ و پەیمانگە تایبەتەكان بكات و بەڕێژەی جیاواز كرێی خوێندن كەمبكرێتەوە.
بەپێی فەرمانێكی وەزاری، كە ئەمڕۆ 31-11-2023، بەواژۆی د. ئارام محەممەد قادر، وەزیری خوێندنی باڵا و توێژینەوەی زانستی حكومەتی هەرێمی كوردستان بڵاوكراوەتەوە، بڕیاردرا بە كەمكردەوەی كرێی خوێندن لە زانكۆ، پەیمانگە تایبەتەكان.
لە فەرمانە وەزارییەكەدا هاتووە، بڕیاردراوە بە:-
- كەمكردنەوەی كرێی خوێندن لە زانكۆ تایبەتەكان بە رێژەی 10% لەو زانكۆ تایبەتانەی كە لە دوایین پرۆسەی ریزبەندی نیشتمانی (NUR) لە گروپی (B)ین.
- كەمكردنەوەی كرێی خوێندن بەڕێژەی 15% لەو زانكۆ تایبەتانەی لە دوایین پرۆسەی ریزبەندی نیشتمانی (NUR) لە گروپی (C)ین.
- كەمكردنەوەی كرێی خوێندن لەزاكۆ تایبەتەكان بەڕێژەی 20% بۆ ئەو زانكۆیانەی لە دوایین پرۆسەی ریزبەندی نیشتمانی (NUR) لە گروپی (D)ین.
وەزارەتی خوێندنی باڵا بڕیاریشیداوە بە كەمكردنەوەی كرێی خوێندن بەڕێژەی 20% لە كۆڵیژە زانكۆییەكان و پەیمنانگە تایبەتەكان.
وەزارەتەكە ئاماژەی بەوەكردووە، ئەم بڕیارە پاڵپشت بە كۆنووسی كۆبوونەوەی ئەنجوومەنی وەزارەتی خوێندنی باڵا و توێژینەوەی زانستی ژمارە (10)ـی ساڵی 2020 كە لە (12-10-2020) و (22-11-2020) ئەنجامدراوە، دەركراوە.