راچڵەكین -

ژمارەی قوربانیانی كەرتی غەززە بەهۆی بەردەوامبوونی هێرش و بۆردومانەكانی سوپای ئیسرائیل، بەرزدەبێتەوەو وەزارەتی تەندروستی غەززەش ئاشكرایدەكات زۆربەی قوربانییەكان ژن و منداڵن.

وەزارەتی تەندروستی فەلەستین لە كەرتی غەززە لە راگەیەندراوێكدا بڵاویكردەوە، بەپێی نوێترین ئامار، ژمارەی كوژراوان بۆ زیاتر لە 12 هەزار كەس بەرزبووەتەوە.

ئاماژە بەوەشكراوە، ژمارەی بریندارانی كەرتی غەززە 30 هەزار كەسی تێپەڕاند، زۆربەی كوژراوو بریندارانیش ژن و منداڵن.

شەڕی نێوان ئیسرائیل و چەكدارانی حەماس كە لەرۆژی 7ی مانگی رابردووەوە دەستی پێكردووەو تائێستاش بەردەوامە، بووەتە هۆی وێرانبوونی بەشی زۆری باكووری كەرتی غەززەو ئاوارەبوونی زیاتر لە ملیۆنێك و 600 هەزار كەس لە دانیشتووانەكەی كە بەناچاری روویان لە ناوچەكانی باشووری كەرتی غەززە كردووە.