راچڵەكین-
وەزارەتی خوێندنی باڵا و توێژینەوەی زانستی هەرێم داوای پڕكردنەوەی هەردوو پۆستی سەرۆكی زانكۆی گەرمیان و سەرۆكی زانكۆی هەڵەبجە دەكات و دەڵێت "هەر كەسێك ئارەزووی هەیە و مەرجەكانی تێدایە، دەتوانێت لە ماوەی دیاریكراودا (سی ڤی) پێشكەش بكات، تا ناوی لە لیستی خوازیاراندا تۆمار بكرێت.
ئەمڕۆ دووشەممە وەزارەتی خوێندنی باڵا و توێژینەوەی زانستی حكومەتی هەرێمی كوردستان مەرجەكانی وەرگرتنی بۆ پۆستی سەرۆكی زانكۆی گەرمیان و سەرۆكی زانكۆی هەڵبجە بڵاوكردەوە كە بریتین لە:
1- هەڵگری بڕوانامەی دكتۆرا بێت.
2- نازناوی زانستی لە پرۆفیسۆری یاریدەدەر كەمتر نەبێت.
3- خزمەتی لە (10) ساڵ كەمتر نەبێت.
ئاماژە بە چەند خاڵێكیش كراوە كە ئەمانەن:
-ئەو بەڕێزەی داواكاری پێشكەش دەكات باشترە دیدو بۆچوون و بەرنامەی كاری خۆی پێشكەش بكات بۆ بەرەوپێشبردنی زانكۆ بۆ ئەو چوار ساڵەی كە پۆستەكەی وەردەگرێت.
-زانینی زمانی ئینگلیزی و شارەزایی لە بەكارهێنانی تەكنەلۆجیای بواری خوێندن و فێركردن و كارایی بڵاوكردنەوەی توێژینەوەی زانستی هەلی زیاتر بۆ پێشكەشكار دەڕەخسێنیت.
-لیستی ناو و ناونیشانی توێژینەوە زانستیە بڵاوكراوەكان.
-پێویستە پوختەی راژەی لەلایەن بەرپرسی یەكەمی فەرمانگەكەیەوە واژوو كرابێت.
دواكات بۆ پێشكەشكردنی (c.v) و پوختەی ڕاژە كۆتایی دەوامی ڕێكەوتی (29/2/2024) ڕۆژی (پێنجشەممە) دەبێت.