راچڵەكین -
سەرۆكی حكومەتی هەرێمی كوردستان رایدەگەیەنێت: پڕۆژەی هەژماری من بەردەوامەو لەگەڵ سەرۆكوەزیرانی فیدراڵ و پارێزگاری بانكی ناوەندی لەپەیوەندیداین سەبارەت بە چەند دەستپێشخەرییەكی پەیوەندیدار بە پێشخستنی سیستەمی بانكی بە هەماهەنگی و بەپێی مەرج و رێنماییەكانی بانكی ناوەندی عیراق.
ئێوارەی ئەمڕۆ یەكشەممە، مەسرور بارزانی، سەرۆكی حكومەتی هەرێم، لەگەڵ شاندێكی ئەنجومەنی بەڕێوەبردنی بانكی بەغداد و بانكی ئوردنی كوەیتی كۆبووەوە.
لەبارەی ناوەڕۆكی كۆبوونەوەكە، مەسرور بارزانی رایگەیاند: گفتوگۆمان لەبارەی دەرفەتەكانی ئەنجامدانی كار و پڕۆژەی هاوبەش لەگەڵ حكومەتی هەرێمی كوردستان كرد لە پێناو پێشخستنی سیستەمی بانكی و پەرەپێدانی ئابووری لە عیراق و هەرێمی كوردستان.
سەرۆكی حكومەت ئاماژەی بەوەشكردووە، تیشكمان خستەسەر چاكسازییەكانی حكومەتی هەرێم لە بواری سیستەمی بانكی و بەدیجیتەڵكردنی خزمەتگوزارییەكان و پارەدانی ئەلیكترۆنی.
سەبارەت بە پڕۆژەی هەژماری من، مەسرور بارزانی رایگەیاندووە، لە كۆبوونەوكەدا باسمان لە بەردەوامبوونی پڕۆژەی ( هەژماری من) كرد و ئاماژەمان بەوەدا كە لەپەیوەندیداین لەگەڵ سەرۆك وەزیرانی فیدراڵ و پارێزگاری بانكی ناوەندی سەبارەت بە چەند دەستپێشخەرییەكی پەیوەندیدار بە پێشخستنی سیستەمی بانكی بە هەماهەنگی و بەپێی مەرج و ڕێنماییەكانی بانكی ناوەندی عیراق.
وتیشی:" شاندەكە سەرسامی خۆیان بەرامبەر ئاست و پێشڤەچوونی پڕۆژەی (هەژماری من) و دیدگامان لەبارەی هەمەجۆركردنی ئابووری و پێشخستنی سیستەمی بانكی نیشانداو هەردوولا هاوڕابووین لە سەر گرنگیی پشتیوانیكردنی هەوڵەكانی حكومەتی هەرێمی كوردستان لە بواری چاكسازی بانكیدا".
