بافڵ جەلال تاڵەبانی، سەرۆكی یەكێتیی نیشتمانیی كوردستان
راچڵەكین -
سەرۆكی یەكێتیی نیشتمانیی كوردستان، پشتیوانی خۆی بۆ بڕیارەكانی دادگای فیدراڵی و ڕۆڵی لە پاراستنی دەستوور، دادپەروەری و سیستمی دیموكراسی دووپات دەكاتەوەو رایدەگەیەنێت: سەربەخۆیی دەسەڵاتی دادوەری یەكێكە لە پایە بنەڕەتییەكانی سیستمی دیموكراسی و رەوتی حوكمڕانی وڵاتانی پێشكەوتوو، هەموو ناوزڕاندن و مامەڵەیەكی خراپیش بەرامبەر دادگای باڵای فیدراڵی رەتدەكەینەوە.
بافڵ جەلال تاڵەبانی، لەو پەیامەیدا كە ئەمڕۆ هەینی بڵاویكردووەتەوە، داواش دەكات پێكەوە كاربكەن بۆ بەهێزكردنی روحییەتی هانابردن و ڕێزگرتنی ڕەها بۆ یاسا و جێگیركردنی سەربەخۆیی و بێلایەنی دەسەڵاتی دادوەری، كە سەرۆك مام جەلال رۆڵی گرنگی هەبووە لە چەسپاندنیدا لە چوارچێوەی دەستووری عیراقدا.
دەقی پەیامەكە:
سەربەخۆیی دەسەڵاتی دادوەری یەكێكە لە پایە بنەڕەتییەكانی سیستمی دیموكراسی و رەوتی حوكمڕانی وڵاتانی پێشكەوتوو. چەسپاندنی سەروەری یاسا و دادپەروەری لە پایەكانی سەقامگیری سیاسی و كۆمەڵایەتین كە زامنی مافی هاووڵاتیان و كۆمەڵگەیە لە عیراق و هەرێمی كوردستان.
لە كاتێكدا ئێمە پشتیوانی خۆمان بۆ بڕیارەكانی دادگای فیدراڵی و ڕۆڵی لە پاراستنی دەستوور، دادپەروەری و سیستمی دیموكراسی دووپات دەكەینەوە، هەموو ناوزڕاندن و مامەڵەیەكی خراپیش رەتدەكەینەوە بەرامبەر دادگای باڵای فیدراڵی، كە دادگایەكی سەربەخۆ و پیشەییە كە بەشداری كارایە لە پاراستنی سیستمی سیاسی لە عیراقدا و پاراستنی سەربەخۆیی ئەوەش لەقوڵایی ئەركە دەستووریی و نیشتمانییەكانە.
دەسەڵاتی دادوەری عیراقی بە سەربەخۆییەكەی ناسراوە و رێزگرتن لەوسەربەخۆییەش رەنگدانەوەی پێشكەوتنی كۆمەڵگەیە و فاكتەرێكی گرنگە كەهاوڵاتیان لەسایەیدا هەست بەسەقامگیری، ئاسایش، ئۆقرەیی و زامنی مافەكانیان دەكەن.
با پێكەوە كاربكەین بۆ بەهێزكردنی روحییەتی هانابردن و ڕێزگرتنی ڕەها بۆ یاسا، سەربەخۆیی و بێلایەنی دەسەڵاتی دادوەری جێگیر بكەین، كە سەرۆك مام جەلال رۆڵی گرنگی هەبووە لە چەسپاندنیدا لە چوارچێوەی دەستووری عیراقدا.
بافڵ جەلال تاڵەبانی
سەرۆكی یەكێتیی نیشتمانیی كوردستان