مەسرور بارزانی، سەرۆكی حكومەتی هەرێمی كوردستان
راچڵەكین -
سەرۆكی حكومەتی هەرێمی كوردستان، بڕیارەكگانی ئەمڕۆی ئەنجومەنی وەزیران ئاشكرا دەكات و رایدەگەیەنێت: حكوومەتی فیدراڵیی دەخەینە بەر بەرپرسیارتییەكی دەستووری و ئەخلاقی تاكو ئەو بەڵێنەی بە ئێمەیان داوە بۆ دابینكردنی مووچەكان جێبەجێ بكەن.
ئەمڕۆ چوارشەممە، مەسرور بارزانی، لە لێدوانێكدا، سەرجەم ئەو بڕیارانەی ئاشكراكرد كە لەكۆبوونەوەی ئەمڕۆی ئەنجومەنی وەزیران دراون و رایگەیاند: وەزارەتی داراییم راسپاردووە دەست بكەن بە دابەشكردنی مووچەی مانگی دوو و ئامادەكاریش بكەن بۆ دابینكردنی مووچەی مانگی سێ و مانگەكانی داهاتووش.
سەرۆكی حكومەت وتیشی:" ئێمە حكوومەتی فیدراڵیی دەخەینە بەر بەرپرسیارتییەكی دەستووری و ئەخلاقی تاكو ئەو بەڵێنەی بە ئێمەیان داوە بۆ دابینكردنی مووچەكان جێبەجێ بكەن".
مەسرور بارزانی، ئاشكراشیكرد، لە كۆبوونەوەی ئەنجومەنی وەزیران، چەند بڕیارێكی دیكە لە بەرژەوەندیی خەڵكی كوردستان دران، كە ئەمانەی خوارەوەن:
وەزارەتی شارەوانی و گەشتوگوزار دەستبكات بە تەرخانكردن و دابەشكردنی زەوی بەسەر هەموو ئەو فەرمانبەرانەی كە تاوەكو ئێستا لە حكومەت سوودمەندنەبوون.
داشكاندن لە پارەی كەڵەكەبووی كارەبا بە رێژەی 20% بكرێت.
داشكاندنی 20% لە سزای كەڵەكەبووی هاتووچۆ و داشكاندنی 50% لە رسووماتی هێنانی گۆشت و داشكاندنی 20% لە كرێی خوێندنی پارالێل لە زانكۆ و پەیمانگە حكومییەكان.
لێخۆشبوونی سزا لە داوكەوتنی بەشداریی دەستەبەری كۆمەڵایەتی و راسپاردنی وەزارەتی شارەوانی بۆ داشكاندنی رسووماتی كەڵەكەبووی ئاو بە رێژەی 20% و داشكاندنی رسووماتی شارەوانی بەتایبەت كرێی كرێچییەكانی وەزارەتی شارەوانی، ئەوانیش بە هەمان شێوە بە رێژەی 20% و لێخۆشبوون لە سزای دواكەوتنی باج لەلایەن پیشەوەران، كاسبكاران و كەمدەرامەتان.