راچڵەکین-

لە راگەیەندراوێکی هەپەگەدا هاتووە، تورکیا چەند رۆژێکە لەشکرکێشی بۆ سەر سنووری مەتینا دەستپێکردووە و لە ئاسمان و زەوییەوە بۆردوومان و تۆپبارانی گەریلا دەکات.

ناوەندی ڕاگەیاندن و چاپەمەنی هێزەکانی پاراستنی گەل-هەپەگە، لە بارەی دەستپێکردنی لەشکرکێشی و هێرشێکی نوێی تورکیا، ڕاگەیاندراوێكی بڵاوکردەوە و دەڵێت: لە شەوی 16ـی ئەم مانگە، لەشکرکێشی تورکیا بۆ سەر سنووری مەتینا دەستیپێکردووە.

هەپەگە ئاماژە بەوە دەکات، لە شەوانی 17، 18 و 19ـی ئەم مانگە، تورکیا هێرشەکانی خۆی بە هێلیکۆپتەر و فڕۆکەی جەنگی بۆ سەر هێزەکانیان فراوانتر کردووە.

ڕاشیانگەیاندووە، "هەریەک لە گردی هەکاری، گردی چارچەل، گردی شەهید چەکدار، گردی شەهید پڵنگ، گردی ئۆرتە، ئاسێ، یەکماڵە، خرابێ، خانکێ، شێلازێ و دەرگەلە" لە ئامانجی هێرشەکانی تورکیان.

ئەوەشیان باس کردووە، تێکرای ئەو ناوچانە، لە هێلیکۆپتەر و فڕۆکەی جەنگی لە ئاسمان و تۆپ لە زەمینەوە، بە بەردەوام و بێ ناوبڕ بۆردوومان و تۆپباران دەکرێت.

دەشڵێن، لە داهاتووەدا زانیاریی زیاتر بەدەست دەگات و بۆ ڕای گشتیی بڵاوی دەکەینەوە.